Dar es Salaam. Kesho macho na masikio yatakuwa kwa wajumbe wa Chama cha Mapinduzi (CCM) nchi nzima, wanaotarajiwa kupiga kura za maoni katika mchuano wa kusaka majina ya mwisho yawatakaowania umeya wa majiji matano na uenyekiti wa manispaa na halmashauri nchini.
Hatua hiyo ni baada ya Kamati Kuu ya CCM kukamilisha mchujo kwa wagombea wote walioomba nafasi hizo na kutoa orodha rasmi ya majina yatakayowasilishwa kwa wanachama kupigiwa kura.
Katika mchujo huo, baadhi ya waliokuwa wakitetea nafasi zao wamepitishwa tena, huku wengine wakikosa nafasi hiyo na kuondolewa katika orodha.
Kwenye mchakato wa mwaka huu, taswira ya ushindani imeonekana kuwa kali zaidi, kati ya wale waliokuwa wakitafuta ridhaa ya kuendelea na nafasi zao na waliokuwa wasaidizi wao, ingawa wanaotetea watahukumiwa kwa utendaji wao.
Akizungumza leo, Novemba 30, 2025 na waandishi wa habari Kisiwandui Zanzibar, Katibu wa Itikadi, Uenezi na Mafunzo wa CCM, Kenani Kihongosi ametaja majina hayo akisema ni baada ya kufanya mchujo kwa makada 1,067 waliojitokeza kuchukua fomu kuhitaji nafasi hizo.
“Unaweza kuona idadi hiyo ni namba kubwa inayodhihirisha ukubwa wa CCM pamoja na demokrasia. Katika nafasi hizo, wapo waliochukua fomu ya kuwania umeya wa halmashauri ya jiji, jumla yao 76 na waliogombea umeya wa manispaa wako 137,” amesema.
Kihongosi amesema wapo waliochukua fomu kuwania uenyekiti wa halmashauri za miji walikuwa 83 na waliochukua fomu kuwania uenyekiti wa halmashauri za wilaya 729, wote Tanzania Bara.
“Upande wa Zanzibar umeya wa halmashauri ya jiji ni mmoja, umeya wa manispaa watu 34 na uenyekiti wa halmashauri za miji walichukua fomu watu saba,” amesema Kihongosi.
Katika kinyang’anyiro hicho cha majiji,akitangaza majina hayo Kihongosi amesema katika Jiji la Dar es Salaam, wamepitishwa watatu Omar Kumbilamoto anayetete nafasi hiyo akichuana na Nurdin Juma (Shetta), Saad Kimji na Robert Banangwa wote ni maarufu na wana nguvu ya ushawishi.
Kumbilamoto anatetea nafasi hiyo kwa mara ya tatu sasa, ya kwanza alikuwa meya wa Ilala kabla ya kupandishwa hadhi kuwa Jiji la Dar es Salaam na atashindana Shetta ambaye ni msanii na ni kada mzoefu wa chama hicho.
Katika Jiji la Mbeya, yamerejeshwa majina matatu akiwamo aliyekuwa Meya wa Jiji la Mbeya, Dormohamed Issa, kazi itakuwa nzito pale atakapochuana na wapinzani wake wawili kugombea nafasi hiyo.
Issa atachuana na Godwine Mwakyusa ambaye ni diwani wa Itiji, Dormohamed Issa (Isanga) na Benjamin Mwandete wa Uyole watakaopigiwa kura na madiwani kumpata mmoja atakayeongoza jopo hilo.
Dormohamed aliyekuwa meya wa jiji hilo kwa miaka mitano iliyoisha, atakuwa na kazi ya ziada kutetea nafasi hiyo tena dhidi ya wapinzani wake, huku akijivunia uwezo kiuchumi, uzoefu na historia ya kile alichofanya katika uongozi wake.
Upande wa Jiji la Dodoma, ni kama mchuano utakuwa kwa meya wa zamani Profesa David Mwamfupe, Hamza Makamba (Uhuru) na Almon Chaula wa Makutupora ambao ni madiwani vijana walioingia kwenye baraza kwa mara ya kwanza kwenye uchaguzi huu.
Mmoja kati ya vigogo waliotazamiwa kutoa ushindani mkali lakini wametemwa ni Kamuli Gombo ambaye ni diwani wa Ipagala.
Profesa Mwamfupe na Makamba wanatoka Jimbo la Dodoma lenye kata 21 huku Chaula akitoka Jimbo la Mtumba lenye kata 20.
Jiji la Mwanza yamerudi majina mawili, yumo Sima Costantine Sima na Happynes Steven Ibasa, watakaochuana kumpata mmoja atakayeongoza jiji hilo.
Kwa upande wa Jiji la Arusha, kuna majina ya makada watatu akiwamo Maxmilliam Iranghe, Matuyani Laizer na Credo Kifukwe.
Upande wa Jiji la Zanzibar, mgombea Kamal Abdulsatar Haji ndiye aliyeteuliwa kugombea nafasi hiyo baada ya jina la aliyekuwa meya wa jiji hilo, Mahmoud Mohammed Mussa kutoteuliwa.
Hivyo, katika kinyang’anyiro hicho Kamal katika nafasi hiyo, hatakuwa na mshindani, hivyo ni kazi ya wajumbe kuamua kumpigia kura ya hapana au ndiyo.
Jiji la Tanga walioteuliwa ni Seleboss Mustafa, Joseph Emmanuel, Idd Ally na Hamza Bwanga.
Waliopitishwa Manispaa
Manispaa ya Kinondoni yamerudi majina mawili, Abdulkadir Mgeni atachuana na Songoro Myonge anayetetea kuongoza nafasi hiyo kwa mara ya tatu sasa.
Ingawa ni vigumu kutabiri katika mchuano huo, lakini Songoro Myonge amejijengea umaarufu kwa kupigania changamoto za wananchi wa eneo hilo ingawa jukumu la kumbakiza litaamuliwa na wajumbe.
Ubungo majina matatu yamerudi akiwamo Zaidi Muliro, Ashura Sengondo na Laurence Mlaki, katika majina hayo mbali na wote kuwa maarufu katika siasa za Ubungo, lolote linaweza kutokea kwa kuwa aliyekuwa anatetea hayumo katika mchuano huo.
Manispaa ya Temeke, kamati kuu ya chama hicho imerudisha majina mawili Juma Rajabu Mkenga na Uzairu Athumani katika nafsi hiyo wote hao ni wageni lolote linaweza kutokea kwa kuwa, aliyekuwa meya sasa ni mbunge wa Mbagala.
Manispaa ya Moshi, majina matatu yamepenya likiwamo la Zuberi Kidumo, Stallone Malinda na Deogratias Mallya, kuteuliwa kwao kumechukua mwelekeo mpya wa siasa.
Vita hiyo sasa imebaki kati ya aliyekuwa meya, Kidumo, pamoja na wenzake hao.
Awali, kabla ya uteuzi huo, majina yaliyokuwa yakitajwa zaidi katika mchuano wa nafasi hiyo yalikuwa ya Kidumo na Juma Raibu, ambaye aliwahi kuondolewa katika nafasi ya umeya kutokana na tuhuma mbalimbali.
Hata hivyo, baada ya kutotajwa katika uteuzi wa mwisho, wafuasi wa Juma Raibu wamehamishia nguvu zao kwa Malinda, jambo linaloonekana kuibua mwelekeo mpya wa kisiasa ndani ya manispaa hiyo.