WAKATI Mkutano Mkuu wa mwaka wa Simba ukiendelea leo Kwenye Ukumbi wa Diamond Jubilee jijini Dar es Salaam, wanachama wa klabu hiyo wameonekana wakiwa katika hali ya tafrani huku baadhi ya ajenda zikiendelea kusomwa ukumbini hapo.
Mkutano huo ambao umeitishwa kwa mujibu wa Ibara ya 22 ya katiba ya Simba ya mwaka 2018 iliyofanyiwa marekebisho 2024, umekumbwa na tafrani ukumbini kutokana na baadhi ya Wanachama kutokubaliana na baadhi ya ajenda zinazoendelea kusomwa.
Tangu mkutano huo umeanza huku ukihudhuriwa na wanachama 720, kumekosekana hali ya utulivu mzuri wa kusikilizana, licha ya ajenda mbalimbali zikiendelea ukumbini hapo.
Mwanaspoti limeshuhudia ukosefu wa utulivu na maneno mbalimbali kutoka kwa wanachama yakizungumzwa, huku wengine wakionyeshwa kutofurahia kwa baadhi ya mambo ambayo yanaendelea hususani ajenda zinazoendelea kusomwa ukumbini.
Minong’ono mbalimbali kwa wanachama hao ni kutaka uwazi zaidi wakati wa uwasilishwaji wa mambo mbalimbali ili kuyajadili na kuyatolea ufafanuzi wa wazi utaolenga moja moja mustakabali wa klabu hiyo.
Hata hivyo, licha ya sintofahamu hiyo ikiendelea, ila Mwenyekiti wa Simba, Murtaza Mangungu ameonekana kupangua kiaina baadhi ya malalamilo na dukuduku kwa wanachama wanayoendelea kuyatoa katika mkutano huo wa mwaka 2025.