Nimeolewa huu ni mwaka wa tatu, mume wangu ananishangaza kwani tulipokutana alisema mimi ni chaguo lake na kweli akanioa. Lakini kila ninavyoishi naye nahisi mimi si chaguo lake.
Mfano tukiangalia movie au popote tunapokuwa kama kuna watu hasa wanawake anavutiwa zaidi na walio na mwili mkubwa na si wembamba kama nilivyo mimi. Nahisi alikurupuka kunioa na ipo siku atatafuta mwanamke mnene kwani ndiyo wanaomvutia zaidi.
Natamani kucheka lakini nakuonea aibu. Mwanaume alisema wewe ni chaguo lake kisha akakuoa bado unadhani alikosea?
Ila sikulaumu, kuna waakati katika ndoa ambapo moyo huanza kujisemea kimya kimya: “Je, mimi ni chaguo sahihi kwake?” Hili swali linatokana na hofu hasa unapoanza kujilinganisha na mifano inayopita mbele ya mwenza wako hususan tunapohisi hatufanani na kile anachokiangalia au kukisifia kwa namna yoyote ile.
Lakini kuna ukweli mmoja wa msingi ambao unapaswa kuutumia kama ngao ambao ni kujiamini. Kama alikuchagua kuwa mke wake, basi tayari aliona thamani ambayo hakuna mwembamba, mnene, mfupi, mrefu, wala hakuna mfano wa sinema anayeweza kuubadilisha.
Ndoa haijengwi juu ya mwonekano wa saa moja mbele ya runinga. Haijengwi juu ya taswira za kulinganisha miili. Inajengwa juu ya uamuzi wa moyo, uamuzi wa mtu mzima kusema… “Nataka huyu awe mtu wangu wa maisha.”
Na uamuzi huu hauwi wa mzaha. Hauchaguliwi na tukio dogo la macho kushituka pale filamu inapobadilika.
Ndiyo, unaweza kuona anavutiwa na mwonekano fulani kwenye filamu, lakini hilo haliondoi thamani yako, uzuri wako, au nafasi uliyonayo moyoni mwake. Watu hutazama vitu mbalimbali, lakini wanachokiishi ndicho kilicho kweli. Na ukweli ni kwamba mume wako anaishi maisha yake na wewe, sio na wembamba wa kwenye runinga.
Kuna kitu naona unakichanganya, unachanganya maisha halisi na vitu vya kawaida sana.
Usitumie nguvu zako kumchunguza, tumia nguvu zako kujithamini.
Mwanamke anayejiamini hubadili hewa ya chumba bila kusema neno. Anaelewa kuwa thamani yake haitokani na macho ya mwingine bali kwenye utulivu wa moyo wake, utulivu wa kujua kuwa yeye ni wa thamani, si wa kulinganishwa.
Hivyo badala ya kuhisi ndoa kama mtihani wa kufaulu au kushindwa, ifanye kuwa jukwaa la kujiinua. Kama kuna jambo linakukwaza, sema nalo kwa sauti ya mtu mzima, laini lakini thabiti. Lakini usijichoshe kufuatilia kila ishara ya macho ya mumeo kwani akitaka wala hutojua na utakapojua atakuwa ameshaota mizizi.
Maana mume anayekuthamini hutaka mke mwenye amani, si mke mwenye wasiwasi wa kila dakika.
Nakusisitiza na ukumbuke siku zote wewe si picha ya kupita ni maisha aliyochagua.
Na mwanamke wa thamani hapotezi muda wake kujilinganisha na kelele za nje. Anasimama imara, anapumua kwa ujasiri, na anatembea akiwa anajua… alichaguliwa si kwa bahati, bali kwa sababu.