Spika wa Majlisi ya Ushauri ya Kiislamu ya Iran (Bunge la Iran) Mohammad Baqer Qalibaf amelaani vikali hatua ya serikali ya Australia ya kuliweka katika orodha nyeusi Jeshi la Walinzi wa Mapinduzi ya Kiislamu (IRGC), akibainisha kuwa hatua hiyo haitaweza kuzuia ushawishi wa IRGC.
“IRGC ni taasisi iliyoasisi kutoka moyoni mwa wananchi wa Iran na imekuwa na jukumu kubwa katika kupambana na ugaidi katika eneo la Asia Magharibi,” Qalibaf ameeleza haya akihutubia kikao cha wazi cha Bunge, leo Jumapili.
Ameongeza kuwa: Madai yasiyo na msingi hayawezi kuzuia nafasi na ushawishi wa jeshi hili imara la Iran na la Kiislamu.
“Iwapo Australia inajaribu, kupitia hatua hiyo hatari, kuufurahisha utawala wa Israel na kupotosha fikra za waliowengi kuhusu jinai na mauaji yake ya kimbari huko Gaza, inapasa kutambua kuwa fedheha ya kuchukua hatua za upande mmoja za kuwapendelea Wazayuni itabakia katika dhamiri za watu wa mataifa ya kanda hii na Ulimwengu wa Kiislamu kwa ujumla,” amesema Spika wa Bunge la Iran.
Novemba 27 mwaka huu serikali ya Australia iliorodhesha Jeshi la Walinzi wa Mapinduzi ya Kiislamu, IRGC, katika orodha nyeusi kama taasisi ya serikali inayofadhili ugaidi.
Tarehe 26 Agosti mwaka huu Australia ilitangaza kumfukuza balozi wa Iran, ikiihutumu Tehran kuwa iliratibu na kupanga matukio mawili ya uhasama dhidi ya Wayahudi huko Sydney na Melbourne mwaka jana. Iran kwa upande wake ilikanusha vikali madai hayo.