Rais wa Pakistan Asif Ali Zardari ametoa pongezi kwa wananchi wa Palestina katika maadhimisho ya Siku ya Kimataifa ya Mshikamano na Palestina akisema: “Juhudi na ujasiri wenu usio wa kuchoka umeunda sura mpya katika historia.”
Zardari amesisitiza kuwa, Pakistan inatilia maanani umuhimu wa pekee uhusiano wake wa muda mrefu na wa kindugu na Palestina na daima imekuwa ikiwaunga mkono wananchi wa Palestina.
Rais wa Pakistan amekumbusha kwamba uungaji mkono kwa Palestina unategemea kanuni za ubinadamu, haki na usawa, na hata katika azimio la Lahore la 1940 lilikuwa nafasi maalum.
Akilaani jinai za Israel huko Gaza, Rais wa Pakistan amesema: “Islamabad imepaza sauti ya wananchi wa Palestina katika vikao vyote vya kimataifa na itaendelea kutoa wito wa kusitishwa mara moja na kudumu kwa mapigano.”
Zardari aliongeza: “Upelekwaji wa misaada ya kibinadamu bila vikwazo na ulinzi wa raia lazima uhakikishwe, na Israel lazima iwajibike kikamilifu kwa uhalifu wa kivita.”
Zardari pia alisisitiza kuwa Islamabad itaendeleza uungaji mkono wake wa kisiasa, kidiplomasia, kibinadamu na kimaadili kwa Gaza, akibainisha kuwa Pakistan inaunga mkono kuanzishwa taifa huru la Palestina kwa kuzingatia mipaka ya kabla ya 1967 na Baytuul-Muqaddas kuwa mji mkuu wake.
Jana Jumamosi Novemba 29 walimwengu waliadhimisha Siku ya Kimataifa ya Mshikamano na Wapalestina kwa maandamano, kampeni za upashaji habari, na wito wa kuchukuliwa hatua madhubuti ili kukomesha ukaliaji kwa mabavu ardhi ya Palestina unaofanywa na utawala wa kizayuni wa Israel kwa uungaji mkono wa Magharibi ikiongozwa na Marekani.