MENEJA wa mchezaji Suzana Adam, James Mlaga amesema sababu za kiungo huyo kurejea Bongo na kujiunga na Tausi FC inayoshiriki Ligi ya Wanawake ni kumjengea hali ya kujiamini baada ya kukaa nje kwa msimu mzima.
Suzana msimu uliopita aliitumikia FC Masar ya Misri alikodumu kwa misimu miwili tangu alipojiunga nayo msimu wa 2022/23 akitokea Fountain Gate Princess ya Tanzania.
Akizungumza na gazeti hili Mlaga amesema sababu mojawapo ya kumrejesha kiungo huyo Bongo ni pamoja na kumtengenezea hali ya kujiamini akiamini kama atapata nafasi Tausi huenda akarudi kwenye kiwango chake.
Aliongeza, sababu nyingine ni kumwondoa kwenye presha ya timu za nje kwani tayari alikuwa na ofa za Morocco na Misri ambako wangehitaji kuonyesha kiwango chake.
“Lengo la kumrudisha Suzan nilimshauri kutokana na kupitia kipindi cha majeraha, ni vyema arudi nyumbani kuanzisha safari yake upya ambako huku hatapata presha ya kucheza hivyo anaweza kurudi taratibu kwenye hali yake ya kawaida,” amesema Mlaga na kuongeza
“Amesaini mwaka mmoja, tumwangalia. Pia tulivutiwa na projecti ya Tausi, wana malengo mazuri na hata ofa yake ilikuwa nzuri hivyo tukaona arejee kwanza.”
Kiungo huyo wa timu ya taifa, Taifa Stars aliitumikia FC Masar kwa msimu mmoja kabla ya kupata majeraha na alionyesha kiwango bora akiwa mhimili mkubwa wa timu hiyo.