GEITA: SERIKALI kupitia Wizara ya Madini imepanga kufanya kikao maalum cha kufanya tathimini juu ya kiini cha tatizo la uhaba na kupanda mara dufu kwa bei ya kemikali ya sianidi migodini.
Waziri wa Madini, Anthony Mavunde ametoa kauli hiyo akiwa wilayani Nyang’hwale mkoani Geita katika hafla ya ugawaji wa leseni kwa wachimbaji wadogo iliyofanyika Kijiji cha Nyijundu.
Mavunde amesema kikao cha tathimini kinatarajiwa kiufanyika Desemba 02, 2025 kikihususha wataalamu kutoka Tume ya Taifa ya Madini pamoja na Ofisi ya Mkemia Mkuu wa Serikali.
Amesema dhamira ya kikao hicho cha tathimini ni kuweza kupata muafaka na njia nzuri ya kupunguza changamoto hiyo inayorudisha nyuma shughuli za uzalishaji wa madini ya dhahabu.
“Huenda sababu zingine zipo nje ya uwezo wetu, kwani ni sababu za kidunia, lakini yale ya ndani ya nchi yetu tutahakikisha yanawezekana ili tuwanusuru na ongezeko kubwa la bei sokoni.
“Kwa hiyo tumejipanga kwanza kufahamu changamoto ni nini, na vipi tuje na njia nzuri ya kuweza kutatua changamoto hiyo” amesisitiza Mavunde.
Amesema serikali imejizatiti kutengeneza mazingira rafiki kuwezesha sekta ya madini kuchangia zaidi katika Uchumi wa taifa kupitia mazingira bora ya uchimbaji, uchenjuaji na biashara.
Awali Katibu Mkuu wa Chama Cha Wachimbaji Wadogo Mkoa wa Geita (GEREMA), Misana Nyabange amesema bei ya kemikali ya sianidi imepanda mara mbili zaidi ya bei iliyokuwepo.
Amesema awali walikuwa wanaagiza China kwa wastani wa shilingi laki tano lakini kwa sasa sianidi inapatikana sokoni kwa bei ya zaidi ya shilingi milioni moja hali inayotishia uchenjuaji salama.
“Tunaomba kilio hiki kiweze kufuatiliwa kwa sababu hatuoni tatizo ni nini, kwa sababu kadri siku zinavyokwenda tunaambiwa bei ya kemikali ya sianidi imepanda sokoni” amesema Misana.
Ifahamike, matumizi ya kemikali ya sianidi ni miongoni mwa teknolojia za kisasa za uchenjuaji wa madini ya dhahabu yenye ufanisi wa kati ya asilimia 90-98 dhidi ya asilimia 40-48 ya zebaki.
Aidha kemikali ya zebaki imetajwa kuwa na madhara madogo katika mazingira iwapo shughuli za uchenjuaji wa dhahabu zitafuata taratibu ikilinganishwa na madhara ya kemikali ya zebaki.