Spika wa Bunge la Libya lenye makao yake mashariki mwa nchi hiyo ametoa mwito kwa Tume Kuu ya Uchaguzi kutekeleza mara moja sheria ya kuitisha haraka uchaguzi wa rais wa moja kwa moja.
Katika taarifa iliyochapishwa kwenye ukurasa rasmi wa Facebook wa ofisi ya vyombo vya habari ya spika, , Aguila Saleh amesema kuwa, yuko pamoja na Bunge hilo la Mashariki katika msimamo wake wa kuunga mkono maandamano ya amani yaliyofanyika katika maeneo kadhaa ya Libya Ijumaa jioni na ametaka kuitishwa haraka uchaguzi wa rais tena wa mtindo wa kuchaguliwa rais huyo kwa kura za moja kwa moja za wananchi.
Taarifa hiyo imesisitiza kwamba maandamano hayo yanaakisi “msimamo na matakwa ya watu wa Libya, ambayo ndicho chanzo cha kuweko madarakani viongozi.”
Spika Saleh amesisitiza kwamba kuitishwa uchaguzi haraka kutalinda umoja na mshikamano wa nchi na taasisi zake, kuzuia mgawanyiko uliopo hivi sasa na kukidhi matakwa ya raia ya kujenga taifa thabiti.
Mapema juzi Ijumaa, miji kadhaa ya Libya, ikiwa ni pamoja na ile ya mikoa ya mashariki na kusini, ilishuhudia maandamano makubwa ya amani ya wananchi ambao walitaka kuitishwa haraka uchaguzi wa rais na kupewa haki ya kuchagua viongozi wao wa kisiasa.
Tangu ulipoangushwa utawala wa kiongozi wa zamani Muammar Gaddafi mwaka wa 2011, Libya imegawanyika kati ya serikali mbili hasimu — Serikali ya Umoja wa Kitaifa yenye makao yake makuu Tripoli inayoongozwa na Abdul Hamid Dbeibah na ambayo inaungwa mkono na Umoja wa Mataifa; na utawala wenye makao yake makuu mashariki ulioteuliwa na Baraza la Wawakilishi unaoongozwa na Osama Hammad.