ARUSHA: CHAMA cha Kuweka na Kukopa cha Usalama wa Raia (Ura Saccos) kimepata hati safi kwa miaka tisa mfululizo kutoka kwa mkaguzi wa nje kutokana na uadilifu wa uendeshaji makini wa chama hicho.
Pia chama hicho kimetoa Sh milioni 180 kama rambirambi na pole kwa wagonjwa ikiweko walioathirika na majanga.
Hayo yamesemwa na Kamishna wa Polisi Kamisheni ya Fedha na Logistiki, CP Liberatus Sabas kwa niaba Mkuu wa Jeshi la Polisi (IGP) Camillus Wambura katika ufunguzi wa mkutano wa 17 wa Ura Saccos Ltd uliofanyika jijini Arusha.
Amesema upatikanaji wa hati hiyo umeongeza ufanisi na utendaji kazi wa polisi wanayopata katika uboreshaji wa ustawi wa maisha kwani kupitia Tehama kinawezesha utoaji wa mikopo ikiwemo kuwajengea uwezo wanachama hao kupitia eneo.
Pia alipongeza chama hicho kitaanza ujenzi wa jengo lao Makao Makuu Dodoma ikiwemo kuongeza idadi ya wanachama hadi kufikia 56,000 ifikapo Desemba,2026 huku ukuaji wa akiba ukiwa ni Sh billioni 139, mikopo yenye thamani ya Sh bilioni 108 imetolewa huku jumla ya wanachama zaidi ya 51,000 wakiendelea kunufaika na huduma za kifedha
Naye, Mwenyekiti wa Bodi ya Ura Saccos, Kamishna wa Polisi Jamii CP, Faustine Shilogile amesema akiba za wanachama zimeongezeka hadi kufikia Sh bilioni 139.0 ikiwa ni ongezeko la asilimia 7 .4 toka mwaka 2024.