Uchunguzi wa timu ya FRANCE 24 Observers unaonyesha namna gesi ya klorini ilivyotumika kama silaha katika vita vya wenyewe kwa wenyewe vinavyoendelea nchini Sudan.
Ushahidi unaonyesha kuwa jeshi la Sudan lilitumia gesi ya klorini ili kukidhibiti tena kiwanda cha kimkakati cha kusafisha mafuta kilichokuwa kikishikiliwa na wanamgambo wa Rapid Support Forces (RSF).
Tarehe 5 na 13 mwezi Septemba mwaka jana mapipa yaliyokuwa na gesi ya klorini yalidondoshwa kutoka angani karibu na kiwanda cha kusafisha mafuta kaskazini mwa mji mkuu wa Sudan, Khartoum. Hii ni kwa mujibu wa ripoti ya timu ya waangalizi wa France 24.
Ripoti hiyo imeeleza kuwa, mapipa hayo yaliyokuwa na gesi ya klorini yalidondoshwa kutoka angani wakati jeshi la Sudan lilipokuwa likijaribu kukikomboa kiwanda cha kusafisha mafuta kutoka mikononi mwa wanamgambo wa Rapid Support Forces (RSF), mahasimu wao katika vita vya wenyewe kwa wenyewe.
Mapipa yalidondoshwa kutoka angani, na jeshi la Sudan ndilo jeshi pekee nchini humo lenye uwezo wa kijeshi wa anga kutekeleza jambo hilo.
Timu ya waangalizi ya France 24 imeendelea kueleza kuwa: Waliweza kufuatilia namna mapipa hayo ya klorini yanayodaiwa kutumika kama silaha za kemikali, yalivyoingia Sudan.
“Uchunguzi wetu unaonyesha kuwa klorini ilisafirishwa hadi Sudan na kampuni inayojulikana kwa jina la Chemtrade International Corporation ya India”, imesema taarifa ya France 24 na kuongeza kuwa, kampuni hiyo ilieleza kuwa gesi hiyo ilikusudiwa kwa madhumuni ya kusafisha maji kwa ajili ya matumizi ya kawaida ya raia.
Timu hiyo pia imegundua kuwa gesi ya klorini iliagizwa na Kampuni ya Ports Engineering, ya Sudan. Tovuti yake inasema kuwa kampuni hiyo inajishughulisha na kusafisha maji kwa ajili ya matumizi ya raia.
Hata hivyo hakuna dalili kwamba mapipa ya klorini yaliingizwa Sudan kwa ajili ya matumizi katika vituo vya kusafisha maji.
Wakati huo huo takwimu za kibiashara zinaonyesha kuwa kampuni ya Chemtrade International Corporation ya India imesafirisha kwa uchache mitungi 125 ya gesi ya klorini hadi Sudan tangu kuanza kwa vita vya wenyewe kwa wenyewe nchini humo.
Je, klorini ilipelekwa Sudan ili kutumika kama silaha au kwa ajili ya kusafisha maji ya kunywa? Ni vigumu kuthibisha suala hilo bila majibu yoyote kutoka kwa kampuni au jeshi la Sudan.