Serikali ya Venezuela imemshutumu Rais wa Marekani Donald Trump kwa kutoa “tishio la ukoloni” baada ya kusema anga kuzunguka nchi hiyo inapaswa kuchukuliwa kuwa imefungwa.
Wizara ya mambo ya nje ya nchi hiyo imeyataja matamshi ya Trump kuwa “uchokozi mwingine uliovuka mpaka, haramu na usio na sababu dhidi ya watu wa Venezuela”.
Marekani haina mamlaka kisheria ya kufunga anga ya nchi nyingine, lakini chapisho la mtandaoni la Trump linaweza kusababisha kutokuwa na uhakika wa usafiri na kuzuia mashirika ya ndege kufanya kazi huko.
Marekani imekuwa ikiendeleza uwepo wake wa kijeshi katika visiwa vya Caribbean, ambavyo maafisa wanasema ni kupambana na magendo ya dawa za kulevya. Rais wa Venezuela Nicolas Maduro amepuuzilia mbali madai ya Marekani ya ulanguzi wa dawa za kulevya akisema ni jaribio la kumuondoa madarakani.
Hiivi karibuni Rais wa Venezuela, Nicolas Maduro alisisitiza kuwa ulimwengu mzima unafahamu kuwa mabepari wanaotawala Marekani wanataka kupora mafuta, gesi na dhahabu ya nchi yake.
Hivi karibuni Marekani ilituma meli ya kivita ya kubeba ndege, USS Gerald R. Ford , ambayo ndiyo kubwa zaidi duniani, pamoja na meli zingine tano za kivita kwenda Amerika ya Kusini, hatua ambayo imekosolewa vikali na Venezuela ikiitaja kuwa ya kichokozi, hatarishi, na kinyume cha sheria za kimataifa.
Tangu Septemba, Washington imeendesha mashambulizi kadhaa dhidi ya meli za kiraia na za uvuvi katika Bahari ya Karibiani, ikidai zinahusiana na biashara ya dawa za kulevya bila kutoa ushahidi wowote.