Waziri wa Mambo ya Nje wa Venezuela amesema nchi yake inathamini kwa dhati uungaji mkono wa Iran kwa nchi hiyo ya Amerika ya Latini mkabala wa vitisho vya kijeshi na mashinikizo ya Marekani.
“Kwa niaba ya serikali ya Kibolivari ya Venezuela na Rais wetu, Nicolás Maduro, tunapenda kutoa shukrani zetu za dhati kwa serikali ya Jamhuri ya Kiislamu ya Iran kwa kulaani vikali hatua ya upande mmoja iliyochukuliwa hivi karibuni na Marekani ya kutangaza kufunga anga ya Venezuela,” amesema Yván Gil Pinto katika ujumbe wake uliotumwa leo Jumapili kwenye ukurasa wake wa Telegraph.
Waziri wa Mambo ya Nje wa Venezuela amesifu msimamo madhubuti wa Iran na kusema Tehran na Caracas zina wasiwasi wa pamoja katika kupigania dunia yenye amani na utulivu.
Ameongeza kuwa: “Msimamo thabiti wa Iran wa kutetea mamlaka ya kitaifa na umoja wa ardhi ya Venezuela umewagusa sana watu wa Venezuela.
Jana Jumamosi, Rais Donald Trump wa Marekani alitangaza kufungwa kikamilifu anga ya juu na karibu na inayoizunguka Venezuela.
Msemaji wa Wizara ya Mambo ya Nje ya Iran, Ismail Baqaei, amelaani uamuzi wa Marekani na kuutaja kuwa ukiukaji wa wazi wa kanuni za kimsingi za sheria za kimataifa, zikiwemo zile zinazosimamia usafiri wa anga duniani.
Trump ametangaza kufungwa anga ya Venezuela huku serikali yake ikizidisha mashinikizo kwa serikali ya Rais Nicolás Maduro sambamba na kutuma jeshi kubwa katika eneo la Caribbean.