Jumla ya wahitimu 1,823 wa Chuo Kishiriki cha Elimu Dar es Salaam (DUCE) wametakiwa kuingia kwenye soko la ajira wakiwa kizazi kipya cha uongozi, ubunifu na uadilifu.
Akizungumza katika mahafali ya 18 ya chuo hicho, Mwenyekiti wa Baraza la Chuo Kikuu cha Dar es Salaam, Balozi Mwanaidi Sinare Maajar, aliwataka wahitimu hao kutumia elimu yao kutatua changamoto za Taifa badala ya kuwa watafuta ajira pekee.
“Chuo kimekuandeni kufikiri kwa kina, kuchambua hoja na kutatua matatizo. Taifa linahitaji watu wanaoona mbali na wenye uadilifu wa hali ya juu,” alisema.
Kwa upande wake, Mwenyekiti wa Bodi ya Usimamizi DUCE, Profesa William Anangisye, alisema wahitimu hao wana wajibu mkubwa katika maendeleo ya Taifa.
“Nyie ni kundi dogo na muhimu kundi la watafutaji majawabu, si walalamikaji,” alisema.
Alisema katika kipindi cha miaka yote tangu kuanzishwa kwa chuo hicho, DUCE imepiga hatua kubwa katika ubora wa ufundishaji, tafiti na ushiriki wa jamii.
Aidha, alimshukuru Mkuu wa Chuo na Rais Mstaafu Dk Jakaya Mrisho Kikwete kwa mchango wake katika kukikuza.
“Safari yenu ya kwanza imefika tamati leo, lakini dunia inawahitaji zaidi kuliko mnavyodhani. Endeleeni kuwa watu wa uadilifu na uzalendo,” aliongeza.
Awali, Rasi wa Chuo, Profesa Stephen Maluka, alisema chuo chao kimeendelea kutimiza majukumu yake ya kufundisha, kufanya tafiti, kutoa huduma kwa jamii na kazi nyinginezo za chuo.
Tangu wakutane hapo mwaka uliopita alisema, watumishi mbalimbali wamewezeshwa kuhudhuria mafunzo ya muda mfupi ili kuboresha utendaji wao na 96 wamewezeshwa kuhudhuria mafunzo ya muda mrefu.
Alisema kwa mwaka 2024/2025, wafanyakazi wapatao 38 wa chuo walirejea kutoka masomoni, ndani na nje ya nchi, na hivyo, kupunguza idadi ya wahadhiri wa muda na kuokoa fedha ambazo zimeelekezwa katika matumizi mengine ya chuo.
“Kutokana na uwekezaji huu katika mafunzo, mpaka sasa, Chuo kina jumla ya Wanataaluma wenye digirii za udaktari wa falsafa 142, ambapo wanawake ni 52 sawa na asilimia 37 na wanaume ni 90 sawa na asilimia 63. Kati yao, Profesa ni mmoja, Maprofesa Washiriki ni saba, Wahadhiri Waandamizi 36 na Wahadhiri ni 98,” alisema.
Kupitia mradi wa HEET, chuo kimejenga mabweni, maabara za kisasa, mifumo ya TEHAMA na vifaa vya ufundishaji vinavyowawezesha wanafunzi kupata elimu yenye ushindani wa kimataifa.
Prof Maluka alieleza kuwa kati ya wahitimu 1,823 waliotunukiwa Stashahada, Shahada za Awali na Uzamili:
1,008 walikuwa wanawake (asilimia 55.3) na 815 walikuwa wanaume (asilimia 44.7)
Katika mahafali hayo, wahitimu bora wanne walitangazwa baada ya kupata GPA ya 4.7.
Wahitimu hao ni pamoja na Ramadhani Raphael Seif – B.Ed. in Science, Gonelimali Roland Julius – B.Sc. with Education, Benedicto Mwamini Scharion – B.A. with Education na Sasila Masalu – B.A. with Education.
Akiwakaribisha wahitimu wote kuendelea na masomo ya Uzamili alisema, chuo kimeendelea kuongeza programu za Uzamili ili kukidhi mahitaji ya watu wenye nia ya kuongeza maarifa katika fani mbalimbali.
“Pia, ninawataarifu kuwa katika mwaka ujao wa 2026/2027, Chuo kinatarajia kudahili wanafunzi katika programu mpya ya Shahada ya Uzamivu katika Lugha za Kiafrika yaani PhD in African Languages,” alisema.
Kukamilika kwa Mahafali ya 18, kunakifanya Chuo kufikisha jumla ya wahitimu 23,547 waliobobea katika fani mbalimbali tangu kuanzishwa kwake.