WAHITIMU wa kozi mbalimbali katika Chuo Cha Usimamizi cha Afrika Mashariki na Kusini mwa Afrika (ESAMI) wametakiwa kukumbatia mageuzi ya kidigitali bila woga kwa uadilifu na maadili kwa maslahi ya Afrika ikiwa ni njia mojawapo ya kuinua uchumi wa bara hilo.
Hayo yalisema jana katika mahafali ya 23 ya ESAMI ambapo wahitimu zaidi ya 350 walihitimu.
Akizungumza Waziri wa Elimu wa Zambia, Douglas Syakalima alisema viongozi na wataalamu wa utawala wamekumbushwa kuwa Afrika haina muda wa kupoteza katika karne hii ya data na akili bandia.
Syakalima alisema katika kipindi ambacho dunia inasonga kwa kasi kuelekea uchumi unaoongozwa na akili bandia tunapaswa kujiuliza tuko tayari kutumia AI au tutumiaje ili kuinua uchumi jibu ni kwamba tunapaswa kuitumia akili bandia kwa uadilifu,kimaadili na kwa maslahi ya Afrika ili kuondoka tulipo na kwenda sambamba na teknolojia inayoenda kwa kasi kwa maslahi ya Afrika
Waziri huyo alisema mageuzi ya kiteknolojia yanayoikumba dunia ni ya lazima yaunganishwe katika mifumo ya serikali, uchumi na elimu hivyo kila mhitimu anapaswa kuwajibika na hilo ikiwa ni njia mojawapo ya kuongeza uchumi wan chi na bara kwa ujumla.
“Katika miaka 10 pekee tumeshuhudia dunia ikibadilika kwa kasi kupitia programu dijitali, data kubwa na AI. Ubunifu sio anasa tena; ni oksijeni ya maendeleo ya kisasa,” alisema Syakalima.
Ameongeza kwa kusema kuwa mataifa makubwa yaliyofanikiwa ama yanayofanikiwa kwa sasa ni yale yaliyoweza kuanza kutumia teknolojia kwa njia ya kimaadili, kiuwajibikaji na kimkakati, huku akisisitiza umuhimu wa wahitimu kuendelea kujifunza teknolojia zinazoibuka na kuziunganisha katika sera, usimamizi na maendeleo ya mashirika.
Waziri huyo aliwataka wahitimu kuwa kizazi cha viongozi wanaoweza kuunganisha maadili ya Kiafrika, mila na teknolojia ili kujenga mifumo bunifu, salama na yenye kuwanufaisha wananchi.
“Afrika ya leo inawahitaji viongozi wanaoweza kutafsiri teknolojia kwa manufaa ya watu wake,” alisema.
Kwa upande wao, baadhi ya wahitimu wa ESAMI akiwemo Theresia Mtewele, aliyehitimu shahada ya uzamili katika uongozi wa biashara, wamesema elimu waliyoipata imewaandaa kuongoza mageuzi ya kiutawala kwa kutumia AI kama nyenzo ya kuongeza uwazi na ufanisi katika taasisi za umma na binafsi.
“Tunatoka hapa tukiwa na uwezo wa kubadili jamii zetu. AI si tishio ni fursa ya kutatua changamoto za kiutawala,” alisema Mtewele
Aidha, Mtewele amewashauri wahitimu wenzake kuhakikisha wanachapisha tafiti zao ili ziwe rejea muhimu kwa jamii na dunia, kwa kuwa zinaibua changamoto, kutoa majibu, na kusaidia kutengeneza suluhisho bunifu katika sekta mbalimbali.
“Afrika ina kila sababu ya kukimbiza kasi ya dunia. ESAMI imetupa misingi ya kufanya hivyo,” aliongeza.
Naye, Mkurugenzi Mtendaji wa ESAMI, Dk Peter Kiuluku kabla ya kumkaribisha mgeni rasmi aliwasisitiza wataalamu wa tafiti waliohitimu katika chuo hicho kutumia ujuzi walioupata kwa jamii katika kufanya tafiti zenye tija kwa jamii na sio vinginevyo.