Dar es Salaam. Waumini wa Kanisa la Ufufuo na Uzima la Askofu Josephat Gwajima leo Novemba 30, 2025 wamefanya ibada ya kwanza ya Jumapili, ikiwa imepita zaidi ya miezi sita tangu kufutiwa usajili.
Juni 2, 2025, Msajili wa Jumuiya za Kiraia, Emmanuel Kihampa alitangaza kulifuta kanisa hilo kwa kile alichoelea limekiuka Sheria za usajili Sura ya 337, kwa kutoa mahubiri yenye mwelekeo wa kisiasa.
Novemba 24, 2025, Waziri Mkuu, Dk Mwigulu Nchemba aliagiza kanisa hilo kufunguliwa huku akielekeza lipewe miezi sita ya uangalizi kuhusu miiko, masharti na sheria za uendeshwaji wake.
Katika ibada hiyo ya leo iliyoanza saa 3:00 asubuhi, mamia ya waumini wamejitokeza huku wengine wakipeperusha bendera 15 zenye nembo, rangi na maandishi tofauti ikiwamo bendera ya Tanzania wakizunguka kwa ishara kama wanafanya paredi wakifuatisha mapigo ya nyimbo za kusifu na kuabudu zinazopigwa kanisani hapo.
Wakiwa na nyuso za furaha, waumini wa kanisa hilo wakiongozwa na maaskofu na mitume wanaendelea na ibada kwenye kanisa hilo lililopo Kibo, Ubungo jijini Dar es Salaam, huku mara kadhaa wakielekezwa kuambiana namna ‘walivyomisiana’ kufanya ibada ndani ya kanisani hilo.
Hadi saa 5 asubuhi, Askofu Mkuu, Gwajima alikuwa hajafika kanisani hapo.
Habari zaidi endelea kufuatilia Mwananchi