Timu ya mawakili inayomwakilisha kiongozi wa zamani wa upinzani nchini Kongo Roger Lumbala imetangaza siku ya Jumanne, Desemba 16, kwamba watakata rufaa siku ya Jumatano, baada ya mteja wao kuhukumiwa kifungo cha miaka 30 jela na Mahakama ya Paris, nchini Ufaransa, kulingana na Radio OKAPI, ikimnukuu Wakili Tshibangu Kalala.
Imechapishwa: Imehaririwa:
Dakika 2 Wakati wa kusoma
Matangazo ya kibiashara
Kulingana na Wakili Tshibangu Kalala, utetezi haushangazwi na hukumu hiyo, ikizingatiwa kwamba Roger Lumbala alikataa kuhudhuria vikao vya kesi hiyo.
Roger Lumbala, mbunge wa zamani na mwanasiasa maarufu wa Kongo, alishtakiwa nchini Ufaransa kwa makosa makubwa yaliyofanywa nchini Jamhuri ya Kidemokrasia ya Kongo. Kutokuwepo kwake kimakusudi kwenye vikao hivyo kulitafsiriwa na mahakama kama kukataa kujitetea, jambo ambalo lilikuwa na uzito mkubwa kwa uamuzi wa mwisho.
Wakati wafuasi wake wakishutumu vyombo vya sheria vya kigeni kama “visivyo kuwa halali,” huko Ituri, eneo la uhalifu unaohusishwa na Roger Lumbala, mashirika ya kiraia yanadai, miongoni mwa mambo mengine, fidia kwa waathiriwa.
Kwa mashirika ya haki za binadamu, hii inawakilisha hatua muhimu katika mapambano dhidi ya kutokujali. Wakati huo huo, mashirika ya kiraia katika eneo la Mambasa, ambapo uhalifu huu ulitendeka, yanadai fidia kwa maelfu ya waathiriwa wa Operesheni “Futa Ubao,” iliyofanyika kati ya mwaka 2002 na 2003.
Matukio hayo yanaanzia mwaka 2002 wakati wa Operesheni “Futa Ubao” katika eneo la Mambasa huko Ituri. Vita vilikuwa vikiendelea nchini Jamhuri ya Kidemokrasia ya Kongo. Wanajeshi wa kundi la waasi wa Kongo (RCD)-National, wakiongozwa na Roger Lumbala, walifanya vitisho na uharibifu huko Ituri.
Kulingana na shuhuda kadhaa, operesheni hii ilihusisha kuwaua wote waliopinga uvamizi wa waasi wa RCD-National. Wanawake wengi walibakwa na waasi, na maelfu ya vifo vilirekodiwa miongoni mwa wakazi katika maeneo ya uchifu ya Mambasa, Babila Babombi, Bwakwanza, na Lese.
Baadhi ya wakazi walilazimika kukimbia vijiji vyao hadi eneo jirani la Beni huko Kivu Kaskazini. Wengine walitafuta hifadhi katika eneo la Bafwasende huko Tshopo.
Mashirika yasiyo ya kiserikali yalirekodi vurugu zilizoenea zilizopangwa na RCD-N, ikitumia ubakaji kama silaha ya vita na kutekeleza mauaji ya kikatili.
Miaka ishirini na mitatu baadaye, maelfu ya walionusurika katika uhalifu huu mkubwa wanahisi kufarijika na uamuzi huu na wanadai fidia.