Umoja wa kitaifa na amani ni nguzo kuu zinazoamua mwelekeo wa maendeleo ya taifa lolote duniani.
Kwa mfano, Tanzania ilishajiandikia historia yake inayoonesha wazi kwamba mshikamano wa wananchi, heshima kwa tofauti za kisiasa, kidini na kijamii, pamoja na utamaduni wa amani, vimekuwa mtaji mkubwa wa kujenga uchumi imara na kuvutia uwekezaji.
Katika dunia ya leo yenye ushindani mkali wa kiuchumi, misingi hii haipaswi kuchukuliwa kwa wepesi, bali kulindwa na kuendelezwa kwa makusudi na vitendo.
Umoja wa kitaifa unajengwa pale wananchi wanapohisi kuwa ni sehemu ya taifa moja lenye malengo ya pamoja. Hii inahitaji usawa mbele ya sheria, haki za msingi kulindwa na fursa za kiuchumi kusambazwa kwa uwiano unaozingatia makundi yote ya jamii.
Pale kunapokuwapo mgawanyiko wa kijamii au kisiasa, hata kama ni kwa kiwango kidogo, hujitokeza hali ya kutoaminiana ambayo huathiri uamuzi wa uwekezaji na kasi ya shughuli za kiuchumi.
Wataalamu wa uchumi wanatuambia mara zote kuwa wawekezaji wa ndani na wa nje, huangalia kwa karibu utulivu wa kisiasa na mshikamano wa wananchi na serikali yao kabla ya kuwekeza mitaji yao.
Amani kwa upande wake ni zao la umoja na haki. Taifa lenye amani huwa na mazingira rafiki ya uzalishaji, biashara na ubunifu.
Hakuna uchumi unaoweza kukua kwa kasi katika mazingira ya vurugu, migogoro ya mara kwa mara au hofu ya kutokuwapo kwa usalama.
Hivyo, amani huwezesha serikali kuelekeza rasilimali zake katika miradi ya maendeleo badala ya kuzitumia kudhibiti migogoro.
Vilevile, amani huongeza imani ya taasisi za kifedha, wafanyabiashara na wawekezaji katika mustakabali wa nchi.
Uchumi imara nao ni nguzo inayotegemea moja kwa moja amani na umoja.
Pato la taifa huongezeka pale wananchi wanaposhiriki kikamilifu katika shughuli za uzalishaji kama kilimo, viwanda, biashara na huduma.
Hivyo, ushiriki huo hauwezi kuwa na tija iwapo jamii imegawanyika au inakosa amani. Uchumi pia hunufaika zaidi panapokuwapo sera thabiti, utawala bora na uwazi katika uamuzi wa kiuchumi.
Mambo haya huimarisha imani ya wananchi na wawekezaji kuwa jitihada zao zitalindwa na kunufaisha taifa kwa ujumla. Uwekezaji ni kichocheo muhimu cha ukuaji wa uchumi. Kupitia uwekezaji, ajira huundwa, teknolojia huingia na mapato ya serikali huongezeka.
Hata hivyo, uwekezaji hauji kwa bahati mbaya; unavutwa na mazingira yenye utulivu, sheria zinazoeleweka na jamii inayothamini amani na mshikamano.
Kwa maana nyingine, vijana wa sasa wa Kitanzania wanapaswa kutambua kuwa Taifa linalothamini umoja wa kitaifa, hutuma ujumbe mzito kwa dunia kuwa ni mahali salama pa kuwekeza na kufanya biashara kwa muda mrefu.
Hivyo ni wajibu pia wa viongozi wa kisiasa, taasisi za umma na wananchi kwa ujumla kulinda misingi hii.
Viongozi wanapaswa kuhubiri na kutenda haki, kuepuka lugha au vitendo vinavyochochea mgawanyiko na kuweka mbele maslahi ya taifa kuliko maslahi binafsi au ya makundi.
Wananchi nao wanapaswa kutumia uhuru wao kwa busara, kuheshimu sheria na kushiriki kikamilifu katika shughuli za kiuchumi na kijamii kwa lengo la kujenga taifa lenye mshikamano.
Kwa jumla, umoja wa kitaifa na amani si kaulimbiu tu, bali ni mtaji wa maendeleo. Bila misingi hiyo, uchumi hudhoofika na wawekezaji hukimbia.
Kwa kuilinda na kuiimarisha amani ya nchi, kukuza mshikamano wa kitaifa na kuwekeza katika sera bora za kiuchumi, Tanzania inaweza kuendelea kuwa kielelezo cha utulivu na maendeleo endelevu duniani, huku ikihakikisha ustawi wa kizazi cha sasa na kijacho.
Kwa ujumla, umoja wa kitaifa na amani si kaulimbiu za kisiasa, bali ni mtaji wa maendeleo endelevu. Bila misingi hiyo, uchumi hudhoofika, uwekezaji hukimbia na ustawi wa wananchi huathirika.
Kwa kuilinda amani, kukuza mshikamano wa kitaifa na kuimarisha sera za uchumi na uwekezaji, Tanzania inaweza kuendelea kuwa mfano wa utulivu na maendeleo, huku ikihakikisha maisha bora na yenye matumaini kwa kizazi cha sasa na kijacho.
Hata hivyo, jukumu la kuimarisha umoja wa kitaifa na amani haliishii kwa serikali pekee.
Sekta binafsi, taasisi za kiraia na vyombo vya habari vina nafasi muhimu katika kujenga maelewano na kuhimiza mazungumzo yenye tija.
Vyombo vya habari vinapaswa kuwajibika kwa kutoa taarifa sahihi, zenye mizani na zinazolenga kujenga jamii, badala ya kuchochea hisia za chuki au mgawanyiko.
Elimu ya uraia pia ni nyenzo muhimu inayopaswa kuimarishwa ili wananchi waelewe haki na wajibu wao katika kulinda mshikamano na amani ya taifa.
0755466690