Treni iliyokuwa imebeba watu 250 imeanguka Jumapili, Desemba 28, katika jimbo la Oaxaca kusini mwa Mexico, na kusababisha vifo vya angalau watu 13 na 98 kujeruhiwa, kulingana na mamlaka.
Imechapishwa:
Dakika 1 Wakati wa kusoma
Matangazo ya kibiashara
Treni iliyokuwa imebeba watu 250 ilipoteza mwelekeo na kuacha njia yake Jumapili katika jimbo la Oaxaca kusini mwa Mexico, na kuua watu wasiopungua 13 na kujeruhi 98, kulingana na mamlaka.
“Kufuatia ajali hii, watu 139 hawako hatarini, 98 wamejeruhiwa (…) na kwa bahati mbaya watu 13 wamepoteza maisha,” Jeshi la Wanamaji la Mexico, ambalo linaendesha reli iliyofanya ajali, limesema katika taarifa.
Treni hiyo, yenye injini mbili na mabehewa manne ya abiria, ilikuwa imeondoka Salina Cruz kwenye pwani ya Pasifiki na ilikuwa ikielekea Coatzacoalcos katika jimbo la Veracruz, kwenye Ghuba ya Mexico.
Treni hii inajulikana kama “Ukanda wa Interoceanic wa Isthmus ya Tehuantepec,” ambayo huunganisha pwani ya Atlantiki na Bahari ya Pasifiki na kwa kawaida hubeba mizigo na abiria.
Reli hiyo ilizinduliwa mwaka wa 2023. Ni mojawapo ya miradi muhimu zaidi ya miundombinu ya serikali ya Rais wa zamani Andrés Manuel López Obrador (2018-2024), sehemu ya mkakati wa kuchochea maendeleo ya kiuchumi kusini mashariki mwa Mexico.
Uchunguzi wazinduliwa
Mrithi wake, Claudia Sheinbaum, amebainisha kuwa waliojeruhiwa walipelekwa hospitalini.
“Nimemwagiza Katibu wa Jeshi la Wanamaji na Katibu Msaidizi wa Haki za Binadamu kutoka Wizara ya Mambo ya Ndani kwenda kwenye eneo hilo na kuwasaidia binafsi familia,” amesema.
Jeshi la Wanamaji limeonyesha kuwa linashirikiana na mamlaka ya uchukuzi “kubaini sababu” za ajali hiyo na kurejesha huduma kwa reli.
“Maafisa wa wizara kutoka Ofisi ya Mwendesha Mashtaka wa Shirikisho huko Oaxaca, pamoja na wataalamu na maafisa wa polisi, wanaratibu juhudi zao na mamlaka ya shirikisho na jimbo ili kufanya uchunguzi unaohitajika,” ameongeza Mwanasheria Mkuu Ernestina Godoy, akizungumza kwenye mtandao wa kijamii wa X.
Mnamo Desemba 20, katika njia hiyo ya reli, treni iligongana na lori la mizigo lililokuwa likijaribu kuvuka kivuko katika jimbo la kusini la Chiapas, bila kusababisha majeraha yoyote.