Nchini Gambia, angalau wahamiaji saba wamefariki na wengine kadhaa hawajulikani walipo baada ya boti yao kuzama usiku wa Desemba 31, walipokuwa wakijaribu kuingia Ulaya kupitia njia ya baharini ya Atlantiki, mamlaka imetangaza.
Imechapishwa:
Dakika 1 Wakati wa kusoma
Matangazo ya kibiashara
Katika taarifa, Wizara ya Ulinzi imebainisha kuwa imearifiwa kuhusu “ajali mbaya ya baharini iliyohusisha boti inayoaminika kuwa na wahamiaji zaidi ya 200.” Chombo hicho kinaripotiwa kuzama usiku wa manane usiku wa Desemba 31, nje ya pwani ya Jinack, katika eneo la North Bank, kaskazini magharibi mwa nchi.
Wakiwa wamearifiwa na wito wa dharura, Jeshi la Wanamaji la Gambia lilianzisha operesheni ya utafutaji na uokoaji karibu saa 7:00 usiku. Meli kadhaa za kijeshi zilitumwa, kwa usaidizi wa boti ya uvuvi. Boti hiyo hatimaye ilipatikana ikiwa imetua kwenye mchanga.
Kulingana na wizara, watu 96 waliokolewa na kwa sasa wanapokea matibabu. Kumi kati yao wako katika hali mbaya. “Kwa bahati mbaya, miili saba imepatikana na abiria wengi bado hawajulikani walipo,” taarifa hiyo imeongeza.
Mamlaka pia inabainisha kuwa baadhi ya waathiriwa si raia wa Gambia. Ukaguzi unaendelea ili kubaini utambulisho wao.
Katika taarifa yake, serikali ya Gambia imetoa “rambirambi zake za dhati kwa familia zilizofiwa na wote walioathiriwa na tukio hili la kusikitisha” na kuthibitisha tena “ahadi yake ya kupambana na uhamiaji haramu.”