Chumba cha Katiba cha Mahakama Kuu ya Venezuela kimemuagiza Makamu wa Rais Delcy Rodriguez siku ya Jumamosi kuchukua majukumu ya rais wa mpito kutokana na kukosekana kwa Nicolas Maduro, ambaye anashikiliwa na Marekani baada ya kukamatwa na jeshi la Marekani siku ya Ijumaa usiku.
Imechapishwa:
Dakika 1 Wakati wa kusoma
Matangazo ya kibiashara
Delcy Rodriguez atachukua “majukumu ya Rais wa Jamhuri wa Venezuela ili kuhakikisha mwendelezo wa utawala na ulinzi wa jumla wa taifa,” Mahakama Kuu imesema. Mahakama itajadili suala hilo ili “kuamua mfumo wa kisheria unaotumika kuhakikisha mwendelezo wa Serikali, utawala wa serikali, na ulinzi wa uhuru bila kuwepo kwa rais wa Jamhuri,” imeongeza.
Baada ya mashambulizi huko Caracas usiku wa Ijumaa, Januari 2 kuamkia Jumamosi, Januari 3, na operesheni iliyosababisha kukamatwa kwa Rais wa Venezuela Nicolás Maduro na jeshi la Marekani, Donald Trump alitangaza kwamba Marekani ingeongoza Venezuela kwa muda. Ndege iliyokuwa imembeba Maduro na mkewe ilitua Marekani jana jioni.
Rais Trump alihutubia waandishi wa habari kuhusu operesheni hiyo kutoka makazi yake ya Mar-a-Lago huko Florida. Alisema kwamba Marekani “itaiongoza” Venezuela hadi mpito wa kisiasa “salama” utakapofanyika.
Shirika la Ndege la Marekani laruhusiwa tena kuruka juu ya Caribbean
Shirika la ndege la Marekani limeruhusiwa tena kuruka juu ya Caribbean, baada ya kuzuiwa kufanya hivyo kutokana na uingiliaji kati wa kijeshi wa Marekani nchini Venezuela, Waziri wa Uchukuzi wa Marekani Sean Duffy ametangaza Jumamosi usiku. “Vizuizi vya awali kwenye anga ya Caribbean vinaisha saa sita usiku saa za Mashariki (12:00 asubuhi Jumapili saa za Ufaransa) na safari za ndege zinaweza kuanza tena,” Sean Duffy ameandika kwenye mtandao wa kijamii wa X.
Shirika la Usafiri wa Anga la Shirikisho la Marekani (FAA) lilikuwa “limepiga marufuku” mashirika ya ndege yaliyosajiliwa na Marekani kufanya kazi katika anga zote za Caribbean siku ya Jumamosi, “kutokana na hatari za kiusalama … zinazohusiana na shughuli za kijeshi zinazoendelea.”