DODOMA: RAIS Dk Samia Suluhu Hassan amesema Tanzania inaelekea kutoka ‘kuzingatia msaada wa afya’ hadi ‘uwekezaji wa afya’ kama msingi wa sera za kigeni za mwaka 2026.
Dk Samia amesema dira ya uchumi wa Dola Trilioni 1 haiwezi kutekelezeka bila Bima ya Afya kwa Wote na miundombinu ya afya yenye uimara.
“Ninachukua fursa hii kualika jumuiya ya kidiplomasia kuendeleza zaidi diplomasia ya tiba, kwa kutusaidia kuwa kitovu cha kikanda cha huduma maalumu za afya. Tunatarajia kutumia sifa ya taasisi kama Taasisi ya Moyo ya Jakaya Kikwete kuvutia watalii na wawekezaji wa matibabu endelevu,” amesema Dk Samia.
Aidha, ametaka kusaidiwa katika uhamishaji wa teknolojia ili kuunga mkono Mpango wa Kuongeza Uwekezaji wa Dawa, ikiwemo mfumo wa “Green Lane” wa kurahisisha idhini na vibali.