Mashariki mwa DRC, tangu shambulio jipya lililozinduliwa na kundi lenye silaha la AFC/M23 linaloungwa mkono na Rwanda huko Kivu Kusini mwezi Desemba, mapigano hayajakoma kabisa. Vurugu hizi zimesababisha ongezeko kubwa la majeraha ya risasi na kuzorota kwa upatikanaji wa huduma za afya, hasa katika eneo la Fizi, ambalo limeathiriwa sana tangu mwanzoni mwa mwaka 2026. Kamati ya Kimataifa ya Msalaba Mwekundu (ICRC) inatoa tahadhari: mfumo wa matibabu uko chini ya shinikizo kubwa.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Na mwandishi wetu huko Kinshasa, Paulina Zidi
Hali ni ngumu katika Hospitali Kuu ya Rufaa ya Fizi, ambayo inasaidiwa na ICRC na ambapo timu ya upasuaji wa dharura ilifika kama msaada mnamo Januari 10. Tangu mwisho wa mwezi Desemba, idadi ya waliojeruhiwa waliolazwa hospitalini katika kituo hiki imeongezeka mara nne. “Kufikia Januari 18, kulikuwa na wagonjwa 115 kwa vitanda 25,” anasema Dkt. Richard Lwandja. Kwa hivyo, Kamati ya Kimataifa ya Msalaba Mwekundu ililazimika kuweka mahema zaidi mahali hapo.
Daktari Richard Lwandja pia anaibua wasiwasi kuhusu suala jingine: upatikanaji wa huduma ya afya. Kulingana naye, “Waathiriwa wengine walifika wakiwa na majeraha yaliyoambukizwa kutokana na matibabu kuchelewa.” Katika ripoti yake, ICRC inabainisha kwamba shughuli katika vituo vingi vya afya vilivyo mstari wa mbele bado zimezorota kutokana na mapigano na ukosefu wa usalama katika eneo hilo. Vituo hivi viliporwa na sasa havina dawa au wafanyakazi wa afya ambao walilazimika kukimbia vurugu hizo.
ICRC pia inataja ugumu wa kupata dhamana za usalama, hali ambayo ni kikwazo kikubwa “kwa wafanyakazi wa kibinadamu kuwafikia watu na maeneo yaliyoathiriwa na mzozo.” Shirika hilo linatoa wito tena wa kuheshimiwa kwa sheria za kimataifa za kibinadamu.