Waziri wa nchi anayehusika na sheria nchini DRC Guillaume Ngefa, amepiga marufuku kwa muda uandikishaji wowote mpya wa wafungwa katika gereza la Makala jijini Kinshasa.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Hatua hiyo ambayo imeanza kutumika tangu Februari 14 imechukuliwa Ili kukabiliana na janga la kipindupindu ambalo tayari limesababisha vifo vya wafungwa watano katika Gereza.
Waraka wa waziri ulisomeka:
“Kwa kuzingatia hali hii na ili kuzuia kuenea kwa janga hili, imeamriwa, kuanzia sasa, kwamba watu wote waliolazwa katika Gereza Kuu la Makala wazuiwe kwa muda hadi taarifa zaidi itakapotolewa, kwamba ziara zisitishwe au zipunguzwe kabisa kulingana na kufuata sheria za usafi na kanuni za sasa za afya na kwamba hatua za kiafya ziimarishwe mara moja, ikiwa ni pamoja na utoaji wa dawa muhimu, usambazaji wa bidhaa za kinga na dawa za kuua vijidudu, na usambazaji wa vifaa vya matibabu vinavyofaa,”
Waraka huo wa Waziri wa sheria amebainisha kwamba maafisa wa magereza, mamlaka za afya, na huduma zote muhimu zinahitajika ili kuhakikisha utekelezaji mkali wa hatua hizi na kuhakikisha ufuatiliaji wao mkali.
Novemba iliyopita, Wakfu wa Amani wa Bill Clinton (BCFP) ulikemea hali mbaya wanayopitia wafungwa katika magereza ya Makala na Ndolo huko Kinshasa.
Mratibu wake, Emmanuel Cole, alisema kwamba alikuwa amehesabu takriban wafungwa 11,404 katika vituo hivi, huku uwezo wa Makala ukifikia 1,500 pekee.
Pia aliripoti visa vya utapiamlo, ucheleweshaji wa mahakama, na matatizo mengine makubwa yanayoathiri magereza haya.
Mwanaharakati huyo alitoa mapendekezo kadhaa kwa serikali, ikiwa ni pamoja na kuharakisha usindikaji wa kesi za wafungwa na kujenga majengo mapya ndani ya eneo la gereza ili kuboresha hali ya kizuizini.