Waziri wa Mambo ya Nje wa Marekani Marco Rubio anapanga kusafiri kwenda Israel wiki ijayo kumjulisha Waziri Mkuu wa Israel Benjamin Netanyahu kuhusu maendeleo ya hivi punde katika mazungumzo ya nyuklia kati ya Marekani na Iran, maafisa wawili wa utawala wa Trump wamesema siku ya Jumatano.
Imechapishwa:
Dakika 2 Wakati wa kusoma
Matangazo ya kibiashara
Rubio anatarajiwa kukutana na Netanyahu mnamo Februari 28, kulingana na maafisa hao, ambao walizungumza kwa sharti la kutotajwa jina ili kutoa maelezo ya mipango ya usafiri, ambayo bado haijawekwa wazi.
Marekani na Iran hivi karibuni zilifanya vikao viwili vya mazungumzo ya moja kwa moja kuhusu mpango wa nyuklia wa Jamhuri ya Kiislamu ya Iran.
Maafisa kutoka pande zote mbili wameelezea hadharani matumaini yao kuhusu maendeleo yaliyopatikana wiki hii, huku Waziri wa Mambo ya Nje wa Iran Abbas Araghchi hata akisema kwamba “dirisha jipya limefunguliwa” kwa ajili ya kufikia makubaliano.
“Kwa njia fulani, mambo yalikwenda vizuri,” alisema Makamu wa Rais wa Marekani J.D. Vance kuhusu mazungumzo hayo wakati wa mahojiano yaliyorushwa siku ya Jumanne kwenye Fox News.
“Lakini kwa upande mwingine, ilikuwa wazi sana kwamba rais aliweka mipaka fulani ambayo Wairan bado hawajawa tayari kutambua na kuheshimu,” alibainisha.
Bw. Netanyahu alikwenda Ikulu ya White House wiki iliyopita kumsihi Rais Donald Trump kuhakikisha kwamba makubaliano yoyote kuhusu mpango wa nyuklia wa Iran yanajumuisha hatua za kudhoofisha mpango wa makombora ya Iran na kukomesha ufadhili wake kwa makundi ya, kama vile Hamas na Hezbollah.
Washington inatathmini uwezekano wa hatua za kijeshi dhidi ya Tehran huku Marekani ikiimarisha uwepo wake wa kijeshi katika eneo hilo, na kuzua wasiwasi kwamba shambulio lolote linaweza kuzidi kuwa mzozo mkubwa katika Mashariki ya Kati.
Siku ya Ijumaa, Bw. Trump aliwaambia waandishi wa habari kwamba mabadiliko ya madaraka nchini Iran “yanaonekana kama jambo bora zaidi ambalo linaweza kutokea.” “Kwa miaka 47, wamekuwa wakizungumza na kuzungumza bila mafanikio yoyote,” aliongeza.
Utawala wa Trump ulituma USS Gerald R. Ford, meli kubwa zaidi ya kubeba ndege duniani, kutoka Bahari ya Karibia hadi Mashariki ya Kati ili kujiunga na meli ya pili ya kubeba ndege na meli zingine za kivita na vyombo vingine vya kijeshi ambavyo Marekani imevipeleka katika eneo hilo.
Ndege nyingi za kivita za Marekani, zikiwemo ndege aina ya F-35, F-22, na F-16, zimeondoka kwenye kambi nchini Marekani na Ulaya katika siku za hivi karibuni kuelekea Mashariki ya Kati, kulingana na Muungano wa Kufuatilia Anga za Kijeshi (MATA), timu ya wachambuzi wapatao 30 wanaofuatilia shughuli za anga za kijeshi na serikali.
Timu hiyo inasema pia imefuatilia zaidi ya ndege 85 za mafuta na zaidi ya ndege 170 za mizigo zinazoelekea katika eneo hilo.
Steffan Watkins, mtafiti na mwanachama wa MATA mwenye makao yake Canada, amesema pia aliona ndege za usaidizi, zikiwemo ndege sita za kijeshi za E-3, zikielekea kwenye kambi nchini Saudi Arabia.
Ndege hizi ni muhimu kwa kuratibu shughuli kubwa. Bw. Watkins alibainisha kuwa ziliondolewa kwenye kambi nchini Japan, Ujerumani, na Hawaii.