Urusi imeendelea na mashambulizi yake ya anga na mashambulizi ya ndege zisizo na rubani kote Ukraine, na kuua watu wengi usiku wa Jumamosi, Novemba 1 kuamkia Jumapili, Novemba 2. Mashambulizi haya yamelenga hasa miundombinu ya nishati ya Ukraine, na kusababisha kukatika kwa umeme kote nchini. Katika mashariki, eneo lote la Donetsk halikuwa na umeme, pamoja na sehemu kubwa ya eneo la Zaporizhzhia (kusini).
Imechapishwa:
Dakika 2 Wakati wa kusoma
Matangazo ya kibiashara
Usiku wa Jumamosi kuamkia Jumapili, Urusi ilirusha ndege zisizo na rubani 79 na makombora mawili ya balistiki nchini Ukraine, kulingana na Jeshi la Anga la Ukraine, ambalo limedai kuangusha ndege zisizo na rubani 67. Rais Volodymyr Zelensky amesema kwamba maeneo matano (Dnipropetrovsk, Zaporizhzhia, Kharkiv, Chernihiv, na Odesa) yalikumbwa na mashambulizi hayo.
Raia wa Ukraine wanakabiliwa na ukosefu wa umeme, huku huduma maalum zikifanya kazi bila kuchoka kutengeneza miundombinu, anaripoti mwandishi wetu maalum huko Kharkiv, Emmanuelle Chaze.
Katika miji mikubwa, kukatika huku kwa umeme kunaweza kudumu kwa saa chache tu, kulingana na ratiba inayozunguka kulingana na maeneo. Lakini maeneo mengine, hasa wilaya zisizo mitambo mizurii, zinateseka zaidi kutokana na hali hii hatari.
Vadim Filashkin, gavana wa jimbo la Donetsk, ametangaza kukatika kabisa kwa umeme katika jimbo hilo. Maelfu ya raia ambao bado wanaishi Kramatorsk, Sloviansk, na katika theluthi moja ya eneo hilo ambalo bado halijakaliwa na Urusi kwa sasa wakazi hawana umeme.
Shambulio la Urusi katika jimbo la Zaporizhzhia (kusini) pia limesababisha takriban kaya 58,000 kukosa umeme, Gavana Ivan Fedorov amesema.
Vikosi vya Urusi vimekuwa vikishambulia miundombinu ya umeme ya Ukraine kila msimu wa baridi tangu mwaka 2022, na kulazimisha nchi hiyo kupunguza usambazaji wake wa umeme na kuagiza nishati.
Raia wengi wameuawa
Mashambulizi ya Urusi yamewaua watu wasiopungua 15 kote nchini, wakiwemo angalau watano katika jimbo la Donetsk. Kulingana na mamlaka katika jimbo hilo, wanne kati yao waliuawa, wakiwemo watoto wawili, katika eneo la Dnipropetrovsk (Mashariki-Kati) na wengine wawili katika eneo la Odessa (Kusini). Karibu watu kumi na tano pia wamejeruhiwa. Watoto waliouawa walikuwa wavulana wawili, wenye umri wa miaka 11 na 14, kulingana na mchunguzi wa haki za binadamu wa Ukraine Dmytro Lubinets.
Kulingana na Volodymyr Zelensky, katika wiki iliyopita, jeshi la Urusi lilishambulia Ukraine kwa karibu ndege zisizo na rubani 1,500, mabomu 1,170 ya angani, na makombora zaidi ya 70. Aliishutumu Moscow kwa kulenga “hasa” raia, huku Moscow ikisisitiza kuwa inalenga malengo ya kijeshi pekee.