Hali mashariki mwa DRC ilikuwa kwenye ajenda ya Baraza la Usalama la Umoja wa Mataifa siku ya Ijumaa, Desemba 12. Mkutano huo ulifanyika siku moja baada ya kundi lenye silaha la AFC/M23, linaloungwa mkono na nchi jirani ya Rwanda, kuuteka mji wa kimkakati wa Uvira.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Kinshasa, Paulina Zidi
Huko Kinshasa, mamlaka ilitaka kufafanua msimamo wake. Akihutubia kikosi cha wanadiplomasia, Waziri wa Sheria alisema kwamba “Vikosi vya Jeshi vya Jamhuri ya Kidemokrasia ya Kongo, vinavyoungwa mkono na vikosi vya washirika, vinajipanga upya ili kulinda uadilifu wa eneo hilo.” Alisisitiza: “Vita vya kuikomboa Kivu Kusini havijaisha.”
Hali ya wasiwasi bado iko juu katika eneo hili, ambalo linakwenda hadi Baraka, nchini DRC, yapata kilomita 100 kusini mwa Uvira. Siku ya Ijumaa, kulingana na vyanzo vya usalama, milio ya risasi iliyohusha FARDC (Vikosi vya Jeshi vya Jamhuri ya Kidemokrasia ya Kongo) ilisikika katika mji wa Baraka, ingawa hali halisi haijabainika.
Mapigano pia yaliripotiwa karibu na Mboko, kati ya wanamgambo wa kujilinda wa Wazalendo dhidi ya wapiganaji wa AFC/M23, ambao kwa sasa bado wako karibu na Uvira.
MSF yasimamisha shughuli zake za kimatibabu
Ikiwa inakabiliwa na hali hii ya usalama inayozorota, shirika la Madaktari Wasio na Mipaka (MSF) limetangaza kusimamisha mapema shughuli zake katika eneo hilo. Shirika lisilo la kiserikali lilizindua operesheni ya dharura ya malaria katika eneo hilo mwezi Agosti mwaka huu, ambayo awali ilipangwa kuendelea hadi mwisho wa mwezi Januari. Timu hizo zimehamishwa, lakini MSF inaonya kuhusu hali ya kiafya inayotia wasiwasi katikati ya msimu wa mvua. “Tunafikia kilele cha msimu wa malaria na tuna wasiwasi kwa sababu hatuwezi kutoa msaada unaohitajika kwa raia,” Ton Berg, meneja wa programu wa MSF huko Kivu Kusini, amesema katika taarifa.
Ukosefu huu wa usalama, kwa mara nyingine tena, umesababisha watu kuhama makazi yao. Wakazi wa mkao wa Kivu Kusini wamevuka hadi mkoa jirani wa Tanganyika.
Katika Kalemie, mtu aliyekimbia makazi yake kutoka Bukavu, ambaye amekuwa huko kwa miezi kadhaa, alithibitisha kuwasili kwa wimbi jipya la watu waliotoroka makazi yao.