Mshauri mkuu wa masuala ya kijeshi wa Kiongozi Muadhamu wa Mapinduzi ya Kiislamu, Ayatullah Sayyid Ali Khamenei amesema kuwa, zaidi ya marubani 16 wa Israel waliangamizwa katika vita vya siku 12 vilivyotwishwa Iran na utawala wa Kizayuni.
Meja Jenerali Yahya Rahim-Safavi amesema hayo katika mahojiano maalum na kuongeza kwamba, ingawa udhaifu mdogo uligunduliwa katika mfumo wa ulinzi wa anga na ujasusi katika siku za mwanzo za vita vya siku 12 mwezi Juni mwaka huu, lakini sasa umefanyiwa ukarabati na kuboreshwa.
Amefafanua kuwa, katika siku mbili au tatu za kwanza za vita hivyo, Iran ilionyesha mapungufu, lakini kuanzia siku ya nne na kuendelea, mlingano wa nguvu ulibadilika na Iran ikaweka ubora kamili katika hatua ya mwisho.
Meja Jenerali Safavi ameeleza bayana kuwa: Kulingana na tathmini za kigeni, karibu asilimia 60 walithibitisha kwamba Iran iliibuka mshindi wa vita hivyo vya siku 12.
Amesisitiza kuwa, Israel ilishindwa kufikia malengo yake iliyotangazwa – kuyumbisha Iran ndani au kudhalilisha miundombinu muhimu na uwezo wa kijeshi na nyuklia – katika hali ambayo Iran ilitimiza malengo iliyokusudiwa.
Hivi karibuni, Hassan Kazemi Qomi, balozi wa zamani wa Iran nchini Iraq, alisema kwamba, katika moja ya operesheni za Iran wakati wa vita vya siku 12, marubani 30 wa Israel waliuawa.
“Hili si jambo dogo kwa utawala wa [Israel],” alieleza hayo na kuongeza kwamba, maelezo mengi kuhusiana na operesheni hizo yamefichwa na utawala wa Tel Aviv hadi sasa. Mwanadiplomasia huyo wa Iran amesisitiza kuwa, lengo kuu la adui ni kubadilisha mfumo wa utawala nchini Iran na kurejea Marekani katika Jamhuri ya Kiislamu, lakini “walishindwa kufikia malengo yao.”