Tume ya Uchaguzi ya Ushelisheli imetangaza leo Jumapili kwamba, uchaguzi wa rrais uliofanyika hivi karibuni utaingia duru ya pili, kwani hakuna mgombea aliyepata zaidi ya asilimia 50 ya kura katika duru ya kwanza.
Kwa mujibu wa matokeo ya duru ya kwanza ya uchaguzi wa rais wa Ushelisheli yalitolewa leo Jumapili. Patrick Herminie wa United Seychelles, chama kikuu cha upinzani nchini humo, alipata asilimia 48.8 ya kura, huku Rais wa sasa Wavel Ramkalawan wa chama cha Seychellois Democratic Union (Linyon Demokratik Seselwa-LDS) akipata asilimia 46.4. Uchaguzi wa rais ulivutia wagombea wanane.
Kwa mujibu wa tume ya uchaguzi, duru ya pili ya uchaguzi huo itafanyika kuanzia Oktoba 9 hadi 11. Visiwa hivyo vya Bahari ya Hindi, vinavyojumuisha visiwa 115, vilianza kupiga kura siku ya Alkhamisi kwa wakaazi wa visiwa vya nje na wafanyikazi muhimu, wakati vituo vya kupigia kura kwenye visiwa vitatu vikuu vilifunguliwa Jumamosi.
Kwa mujibu wa Katiba ya Ushelisheli, muhula wa urais ni miaka mitano. Mgombea ambaye atapata zaidi ya nusu ya kura katika duru ya kwanza anatangazwa mshindi. Ikiwa hakuna mgombeaji atakayepata idadi hiyo, washindani wawili wakuu wanaingia kwenye duru ya pili ya upigaji kura.
Kadhalika Tume ya Uchaguzi imetangaza matokeo ya uchaguzi wa Bunge la Kitaifa. United Seychelles imeshinda viti 19, huku LDS ikipata viti 15.
Ikumbukwe kuwa, Rais wa sasa wa visiwa hivyo, Wavel Ramkalawan aliibuka mshindi katika uchaguzi wa mwaka 2020 kwa kupata asilimia 54.9 ya kura zilizopigwa, na kumbwaga rais aliyekuwa madarakani wakati huo, Danny Faure aliyeambulia asilimia 43 ya kura.