Harakati ya Mapambano ya Kiislamu ya Palestina Hamas imetangaza kuwa, haijapokea mapendekezo yoyote mapya kutoka kwa wapatanishi na iko tayari kuzingatia mapendekezo yatakayotolewa kama yatakuwa na maana ya kuzingatiwa na kama yatakuwa na nguvu za uwajibikaji.
Kwa mujibu wa Shirika la Habari la Tasnim, Harakati ya Mapambano ya Kiislamu ya Palestina (Hamas) ilitoa taarifa jana Jumapili na kusisitiza kwamba haijapokea mapendekezo yoyote mapya kutoka kwa wapatanishi wa mazungumzo hayo.
Taarifa ya Hamas imeongeza kuwa: Mazungumzo yamesitishwa tangu lilipofeli jaribio la mauaji ya kigaidi lililofanywa na utawala wa Kizayuni tarehe tisa mwezi huu Septemba huko Doha, mji mkuu wa Qatar.
Taarifa hiyo pia imesema, Muqawama uko tayari kuzingatia pendekezo lolote utakalopokea kutoka kwa wapatanishi kwa mtazamo chanya na wa kuwajibika lakini hautaacha kulinda haki za kitaifa za Wapalestina.
Jioni ya Septemba 18, ndege 15 za kivita za Israel zilishambulia Doha, mji mkuu wa Qatar, kwa makombora 12 na kuua watu wasiopungua 10.
Lengo la shambulio hilo lilikuwa ni kuua viongozi wa Ofisi ya Kisiasa ya Hamas waliokuwepo Doha. Wazayuni waliwashambulia kikatili viongozi wa Hamas walipokuwa wanapitia mpango wa hivi karibuni zaidi wa kusitisha mapigano uliotolewa na Marekani.
Kwa mtazamo wa wachambuzi wa masuala ya kisiasa, shambulio la kigaidi la utawala wa Kizayuni dhidi ya Doha, mji mkuu wa Qatar na kulenga makao makuu ya timu ya mazungumzo ya Hamas nchini humo, katika wakati ambapo utawala wa rais wa Marekani Donald Trump ulidai unajaribu kufikia makubaliano ya kusitisha vita huko Ghaza, kwa hakika lilikuwa ni dharau ya wazi kwa nchi zote za Kiarabu.