Dar es Salaam. Mgombea ubunge wa Mbagala kwa tiketi ya Chama cha Ukombozi wa Umma (Chaumma), Khadija Mwago ameahidi kuwa atatoa asilimia 10 ya mshahara wake wa kibunge kwa ajili ya kusaidia wananchi wa jimbo hilo kiuchumi na kijamii endapo atachaguliwa katika uchaguzi unaotarajiwa kufanyika Oktoba 29, 2025.
Amesisitiza asilimia hiyo ataiunganisha na ile ya mfuko wa jimbo huku akieleza anauchungu na anapitia wakati mgumu kuona wakazi wa Mbagala wanapitia hali ngumu ya maisha huku wawakilishi waliopewa dhamana wakijitenga.
Akizungumza kwenye mkutano wa kampeni, uliofanyika Mbagala Oktoba 3, 2025 mkoani Dar es Salaam huku mgeni rasmi akiwa mgombea urais Tanzania kupitia chama hicho, Salum Mwalimu ambaye alitumia fursa hiyo kuwanadi kwa umma.
Mwago amesema wananchi wa Mbagala wanakabiliwa na changamoto nyingi, zikiwemo huduma duni za afya, miundombinu mibovu ya barabara, ukosefu wa ajira kwa vijana na mazingira duni kwa wafanyabiashara wadogo (Wamachinga).
Amesisitiza kuwa kupitia Chaumma, mabadiliko ya kweli yanawezekana kama ilivyoshuhudiwa katika baadhi ya nchi nyingine za Afrika.
“Nawaomba Wanambagala mnichague Oktoba 29. Nina dhamira ya kweli ya kuwatumikia na kuwasemea kero zenu bungeni. Mabadiliko yanawezekana,” amesema kwa msisitizo.
Miongoni mwa vipaumbele vyake, Mwago ametaja kuwa ni pamoja na kuanzisha vituo vya elimu ya ujasiriamali kwa vijana, kuhakikisha upatikanaji wa mikopo yenye riba nafuu ili kukuza mitaji ya wafanyabiashara.
Vilevile, ameahidi kurejesha asilimia 10 ya mshahara wake kwa jamii, hususan katika sekta ya afya na ustawi wa wananchi.
Akigusia changamoto ya afya, Mwago amesema Jimbo la Mbagala lina zaidi ya mitaa 45 lakini lina chini ya zahanati 10, hali inayowalazimu wananchi, hususan wanawake na watoto, kusafiri umbali mrefu kutafuta huduma za matibabu.
Katika kulinda haki za wamachinga, ameeleza kuwa atahakikisha wanatengewa maeneo rasmi ya kufanyia biashara ili kuwaepusha na manyanyaso na usumbufu kutoka kwa vyombo vya dola.
Mwago amehitimisha kwa kuwahamasisha wananchi wa Mbagala kutumia siku ya uchaguzi kama fursa ya kufanya mageuzi ya kweli.
“Siku ya uchaguzi ni siku ya kusema hapana kwa CCM. Wametufikisha hapa, wakati umefika tuwalete mageuzi,” amesisitiza.
Kwa upande wake, Mwalimu ameahidi kuchukua hatua thabiti kukabiliana na mfumuko wa bei unaoathiri maisha ya Watanzania wengi, endapo atapewa ridhaa ya kuongoza nchi hiyo.
Ameeleza kuwa dhamira yake ya kuingia Ikulu si kwa faida binafsi, bali kwa nia ya dhati ya kulitumikia taifa.
“Wakati naitafuta Ikulu, siitaki kwa tamaa, bali naitaka na pepo kwa ari, uzalendo na moyo wa utumishi,” amesema.
Mwalimu amesema kuwa mfumuko wa bei ni changamoto kubwa inayowaumiza wananchi wa kawaida na serikali yake itaweka mkazo katika kuinua uchumi wa ndani, kudhibiti matumizi ya serikali na kuimarisha uzalishaji wa chakula pamoja na bidhaa muhimu.
Ameahidi kujenga mfumo wa haki wa kiuchumi unaolinda wanyonge na kutoa nafasi kwa kila Mtanzania kunufaika na rasilimali za taifa.
Salum Mwalimu ameonyesha dhamira ya kuwa kiongozi wa mabadiliko huku akiwataka Watanzania kujitokeza kwa wingi kumpa kura ya ndiyo ili kuleta mwelekeo mpya wa kiuchumi na kijamii nchini.
Awali, katika mkutano huo, Herman Kiloloma, mgombea ubunge Chamazi kupitia chama hicho, amebainisha changamoto lukuki zinazolikumba eneo hilo ikiwemo miundombinu ya barabara kutoka Chamazi, Msongola hadi Kivule.
“Barabara zetu ni mbovu, viwanda vipo lakini mishahara ni midogo, wananchi wanashindwa hata kumudu maisha ya kila siku,” amesema Kiloloma.
Ameongeza kuwa changamoto ya maji ni ya muda mrefu na akichaguliwa, ataenda kupambana kuhakikisha wananchi wanapata maji safi na salama kwa matumizi ya nyumbani na shughuli za kiuchumi.
“Madarasa ni machache, wanafunzi wamejazana, lakini Serikali iliyopo haina mpango. Mimi nitahakikisha kila mtaa wa Chamazi unakuwa na shule ili kuwaandaa vijana wetu kwa maisha ya kesho,” amesema.
Kiloloma pia amekosoa sera ya kodi isiyo na msingi katika maeneo ambayo Serikali haijawekeza huduma yoyote hasa kwenye masoko, akisema mpango huo unawanyonya wananchi wa kipato cha chini.