Dar es Salaam. Mgombea urais kwa tiketi ya Chama cha Ukombozi wa Umma (Chaumma), Salum Mwalimu ameahidi kufumua mfumo wa elimu ili kuhakikisha unaendana na wakati utakaowezesha wahitimu kushindana na katika soko la ajira.
Mwalimu ambaye ni Katibu Mkuu wa Chaumma, amesema chama hicho, kimedhamiria kujenga kizazi bora kwa kuhakikisha watoto wanapata elimu bora ikiwemo kujua mapema na kwa usahihi lugha ya Kiingereza wakiwa shule za msingi.
Mwalimu ameeleza hayo leo Jumamosi Oktoba 4, 2025 wakati akihutubia wananchi wa Jimbo la Kinondoni jijini Dar es salaam katika mkutano wa hadhara uliofanyika uwanja wa Shule ya Msingi Hananasif katika mwendelezo wa kusaka kura katika uchaguzi mkuu wa Oktoba 29.
Amefafanua kuwa msingi mzuri wa watoto wa sasa na kizazi kijacho ni lugha ya Kiingereza katika sekta ya elimu, hivyo Chaumma imeamua kulivalia njuga suala hilo.
Mwalimu amesema ndio maana baadhi wazazi nchini wanakimbilia kuwapeleka watoto shule za kimataifa, si kwa ajili ya kupata elimu bora pekee bali wajue Kiingereza ambayo ni lugha ya mawasiliano na biashara katika mataifa mbalimbali.
“Sasa tujiulize wangapi wana uwezo wa kuwapeka watoto wao shule binafsi za kisasa? Kama hawana uwezo tunachukua hatua kuliandaa Taifa letu ili mtoto akimaliza darasa la saba ajue Kiingereza.
“Tukubaliane lazima tufumue mfumo wa elimu ndugu zangu, msingi wa maisha yetu ili ukabiliane na wakati uliopo sasa, lazima uanzie kwenye elimu.Tukiendelea kuamini katika elimu ya sasa, basi watoto wetu watapitia maisha magumu kuliko sisi,” ameeleza.
Kwa mujibu wa Mwalimu, amesema ataitisha mjadala wa kitaifa ili kujadili suala la elimu ndani ya siku 100 ya utawala wake kuangalia Tanzania inataka elimu ya namna gani ili kumuandaa mtoto.
“Mungu akinijaalia nikashika madaraka Oktoba 29, nitakiona Kiingereza kama nyenzo ya kumudu na kukabiliana na maisha yanayotuzunguka. Tukiendelea na elimi hii pasipo mabadiliko itatuongezea umasikini kwa sababu mtoto akihitimu darasa la saba ajiwezi,” amesema.
Mbali na hilo, Mwalimu amewaahidi Watanzania kubadilisha hali ya huduma za afya ili kuhakikisha Watanzania wanapata matibabu bora, akisema kila alipopita amekumbana na changamoto hizo.
Katika hatua nyingine, Mwalimu amempongeza mgombea ubunge wa chama hicho kwenye Jimbo la Kinondoni Moza Ally kwa namna alivyopambana ili Kinondoni iende kwa Chaumma akiahidi kumpeleka mchakamchaka mgombea mwingine wa jimbo hilo.
“Nimekuwa nikifutilia mikutano ya Moza kupitia vyombo vya habari, naomba tumuunge mkono Moza, sina mashaka naye kwa sababu najua uwezo wake.Habari ya mjini Kinondoni tunakwenda Moza Ally,”
Pia, amewashukuru vijana kwa namna wanavyomuunga mkono kwenye mikutano yake, akirejea kauli yake kuwa 2025 ni mwaka wa ‘masela ‘kutinga Ikulu akisema hatawaangusha akifanikiwa kushika dola Oktoba 29.
Katika mkutano huo, alikuwepo mgombea mwenza wa urais, Devotha Minja ambaye amesema ratiba zake ilikuwa awepo mkoani Morogoro kisha kesho awepo Buchosa mkoani Mwanza.
“Ndugu zangu wana Kinondoni tuungeni mkono, nitawashaanga kama mtakipigia kura CCM. Tuungane tuiondoe CCM Oktoba wanasema tukatiki? Sasa tukatiki kitu gani? Wakati hali ngumu.
“Ndugu zangu twendeni tukapige kura ya ukombozi Oktoba sio kwenda kutiki. Oktoba 29 twendeni na Chaumma, twendeni na Salumu Mwalimu, Devotha na Moza Ally,” amesema Minja ambaye pia ni Makamu Mwenyekiti wa Chaumma (Bara).
Mgombea ubunge wa Kinondoni, Moza Ally amesema atahakikisha anakuwa mbunge wa wananchi wote wa Kinondoni, akisema atakuwa na dawati maalumu kwa ajili ya kuhudumia changamoto za wananchi hao.
“Nitahakikisha nakuwa mbunge wa watu wote tutakuwa kitengo cha sheria ili kuwasaidia wananchi wa Kinondoni. Pia nitakuwa na kitengo cha miradi ili kuwasaidia wananchi katika masuala ya mikopo.
“Naomba niazimeni imani mnipe kura zenu na mkawaambia wengine kwamba Kinondoni tumeamua kwenda Moza Ally. Lakini kwa upande wa urais waambieni tunakwenda na Salum Mwalimu,” amesema.
Mbali na hilo, Moza amewataka wananchi wa Kinondoni kutomwangusha katika sanduku la kura kwa sababu ana dhamira ya dhati ya kuwatumikia ili kutatua changamoto zinazowakabili.