Waziri wa Fedha wa Jamhuri ya Muungano wa Tanzania, Mwigulu Nchemba leo, Oktoba 5, 2025 amegeuka kivutio katika Viwanja vya Bombadia, Singida Mjini kunakofanyika sherehe za kuipongeza timu ya Singida Black Stars kwa kutwaa ubingwa wa Kombe la Kagame 2025.
Mamia ya mashabiki wa soka waliojitokeza katika sherehe hizo, wamemshangilia kwa nguvu Mwigulu wakati alipowasili viwanjani hapo ghafla kushiriki sherehe za timu hiyo ambayo yeye ni Mlezi wake.
Akizungumza katika sherehe za kuipongeza timu hiyo kwa kutwaa ubingwa wa Kombe la Kagame jana, Nchemba ambaye ni Waziri wa Fedha amesema anaamini timu hiyo inaweza kutwaa taji la Ligi Kuu.
“Nina furaha kubwa kwa kombe hili kuwa katika ardhi ya mamaangu hapa Singida. Tulikuwa na kikao cha chama sasa nilivyosikia habari za timu kufika na mimi nikasema sintachelewa kuona huu utukufu.
“Nimpongeze kocha na wachezaji kwa ushindi huu mkubwa lakini pia ninawapongeza wachezaji wa 12 ambao ni mashabiki kwa kutoa nguvu kwa wachezaji.
“Sisi kama ilivyo kwa mkulima wa ngombe, sisi tunafuata kile kinachofanywa. Naamini makubwa zaidi yanakuja na mimi nitakuwa bega kwa bega kufanikisha hilo ambalo limesemwa la ubingwa wa Ligi kuja hapa,” amesema Mwigulu.
Kocha Miguel Gamondi amesema kuwa wachezaji wake hawapaswi kubweteka kwani wana kibarua cha kuhakikisha wanapata mafanikio katika Ligi.
“Niwapongeze wachezaji, wenzangu wa benchi la ufundi na viongozi kwa kazi nzuri ambayo tumefanya pamoja. Bado tuna kazi ya kufanya,” amesema Gamondi.
Mamia ya mashabiki wa Singida Black Stars wamejitokeza katika mapokezi hayo ambayo yanaongozwa na Mkuu wa Mkoa wa Singida, Halima Dendego.
Msafara wa kikosi hicho, umeanzia Puma nje kidogo ya mji wa Singida huku ukiwa na magari na pikipiki na ukaishia viwanja vya Bombadia.