Dar es Salaam. Kwenye ulimwengu wa burudani, ndoa mara nyingi huwa tukio linalovuta macho na masikio ya mashabiki. Watu hutarajia kuona harusi za kifahari na mwaliko wa mastaa wakubwa.
Hata hivyo, kinyume na matarajio hayo, kuna baadhi ya wasanii walioamua kufunga ndoa kwa usiri mkubwa bila kelele za mitandao wala kamera za vyombo vya habari.
Wengine hufanya hivyo ili kuepuka drama za mahusiano, wengine wakiamini ndoa ni jambo la kifamilia zaidi kuliko la kibiashara au umaarufu.
Staa wa Bongo Fleva Juma Jux alimuoa muigizaji wa Nigeria, Priscilla Ojo kwa sherehe kubwa iliyofanyika nchi mbili Tanzania na kwa upande wa mkewe ikitajwa kama moja ya ndoa za kifahari.
Siyo watu maarufu wote wanapenda mbwembwe za sherehe za harusi, wapo waliofunga ndoa kimya kimya bila harusi kama ilivyokuwa kwa msanii Naseeb Abdul ‘Diamond Platnumz’ na Zuhura Othman ‘Zuchu’.
Mwananchi limekuchambulia baadhi ya ndoa za mastaa wakubwa duniani zilizofungwa kimya kimya.
- Jay Z & Beyonce
Ni moja ya ndoa za mastaa wakubwa ambayo hadi leo hii bado inajadiliwa kutokana na usiri mkubwa uliyofanywa na wanatajwa kama moja ya ndoa za wasanii zilizodumu muda mrefu ikitimia mwaka wa 17 sasa.
Uhusiano wao ulianza mwishoni mwa miaka 1990 ila walipotoa kolabo yao wa kwanza, 03 Bonnie & Clyde (2002) iliyosampo wimbo wa 2Pac, Me and My Girlfriend (1996), ndipo tetesi za kuwa pamoja zilishika kasi ingawa walikanusha wakati huo.
Nyota hao wa Marekani walifunga ndoa kwa siri Aprili 4, 2008, huko Manhattan, Marekani. Licha ya kufanya harusi kuwa siri na kutotangaza mipango ya harusi hiyo, pia wana ndoa hao hawakutangaza uchumba wao.
Harusi ilifanyika katika jumba la kifahari la Jay-Z huko Manhattan, New York. Wageni waliohudhuria waliombwa waache nyumbani simu zao za BlackBerry ili kutunza ufaragha wa tukio hilo.
Hata wageni waliohudhuria walikuwa 40 pekee na hakukuwa na mastaa wengine zaidi ya wasanii wa Destiny Child, Kelly Rowland na Michelle Williams pamoja na marafiki zao Gwyneth Paltrow na Chris Martin.
Kuanzia ndoa hadi walipobarikiwa kupata watoto watatu wasanii hao waliweka usiri mkubwa hasa pacha wa Rumi waliozaliwa mwaka 2017 akiwa haonekani kwenye matukio kama mwenzie ama binti mkubwa, Blue Ivy.
2. Justin Bieber & Hailey Baldwin
Bieber (29) na Hailey (27) kwa mara ya kwanza walikutana Novemba 2009 katika hafla ya kipidi cha Today Show baada ya muigizaji Stephen Baldwin ambaye ni rafiki na mama mzazi wa Bieber, Pattie Mallette kuwakutanisha.
Walianza uhusiano kwa mara ya kwanza mwaka 2015, lakini haukudumu kwa muda mrefu na wakaachana mwaka 2016, walipitia kipindi cha kupanda na kushuka.
Baada ya miaka miwili ya kupishana walirudiana tena mwezi Mei 2018 miezi michache baadaye walichumbiana nchini Bahamas.
Msanii huyo aliyevuma na kibao cha Baby (2010) alifanya harusi ya siri na mpenzi wake huko New York City Septemba 2018. Ndoa hiyo ilifanyika miezi miwili baada ya kuchumbiana huko Bahamas Julai 7, 2018 kwa mujibu wa mtandao wa People.
Baada ya ndoa ya faragha mahakamani, ilifuatiwa na sherehe kubwa huko South Carolina Septemba 2019. Sherehe ya kwanza ilikuwa ndogo wakati sherehe ya pili ilihudhuriwa na wageni 154, wakiwemo wana familia na marafiki.
Bieber alieleza kwenye moja ya mahojiano kuwa aliamua kufunga ndoa ya kimya ili kuepusha maneno ya mitandaoni ambayo yalimzonga kuwa bado alikuwa anampenda mpenzi wake wa zamani, Selena Gomez.
3. Cardi B & Offset
Msanii Cardi na Offset walioana kwa siri Septemba 20, 2017, kabla ya rapa huyo wa kundi la Migos kumchumbia kwenye jukwaa kwenye tamasha la Power 99 la Powerhouse huko Philadelphia Oktoba mwaka huo huo.
Cardi B na Offset walidumu kwenye ndoa yao kwa takribani miaka saba, walianza kuchumbiana mwaka 2017 na baadaye kufunga ndoa ya kimya Septemba mwaka huohuo.
Katika kipindi chote hicho walipata watoto watatu, hata hivyo, ndoa yao ilikumbwa na changamoto nyingi za misukosuko na mwaka 2024 wakaamua kuachana.
Chanzo cha kuvunjika kwa ndoa hiyo ilidaiwa kuwa tuhuma za usaliti, Offset mara kadhaa alihusishwa na kashfa za usaliti, Ingawa Cardi B aliwahi kumsamehe, hali hii iliendelea kuleta mizozo ndani ya ndoa.
Ukiachana na usaliti kwa mujibu wa mahojiano rapa huyo aliwahi kusema, walikua wanagombana mara kwa mara kuhusu majukumu ya kifamilia na malezi ya watoto, ikiwemo madai Offset hakushiriki ipasavyo katika kugharamia na kulea watoto.
Kulingana na Hakimu wa Kaunti ya Fulton huko Georgia, Cardi aliwasilisha kesi ya talaka dhidi ya Offset miaka mitatu baadaye na Septemba 15, 2020 wakaachana.
Kwa sasa Cardi B ana uhusiano na nyota wa NFL, Stefon Diggs na wanatarajia mtoto baada ya rapa huyo kutangaza hivi karibuni kuwa ana ujauzito.
4. Ed Sheeran & Cherry
Pamoja na utajiri mkubwa wa Ed Sheeran anatajwa kuwa miongoni mwa wasanii walisokuwa na mambo mengi, kuanzia kwenye mavazi yake, mwonekano wake na namna anavyoshiriki kwenye mambo ya kijamii.
Mkali huyo aliyetamba na kibao cha Perfect Ed Sheeran alifunga ndoa na mchumba wake wa tangu utotoni, Cherry Seaborn katika sherehe ndogo ya siri Desemba 2018.
Harusi hiyo ilikuwa ya siri na walihudhuria watu wachache ikiwemo marafiki zake, ndugu na familia hata hivyo baada ya ndoa ya siri baadae walifanya sherehe kubwa iliyohusisha watu mbalimbali.
Hata hivyo Ed Sheeran raia wa Uingereza alizungumzia sababu ya kufunga ndoa ya siri kwenye moja ya mahojiano akisema alifanya hivyo kuweka siri ili kuepusha vyombo vya habari na mapaparazi.
5. Nicki Minaj & Kenneth
Nicki Minaj na Kenneth Petty walifunga ndoa Oktoba 21, 2019, walikuwa marafiki wa muda mrefu tangu walipokuwa vijana wakikua katika eneo la Queens, New York kabla ya kutoka kimapenzi mwaka 2018.
Baada ya muda mfupi wa uchumba, waliamua kuoana kwa harusi ndogo ya faragha bila sherehe kubwa ziliwekwa video kwenye mitandao ya kijamii
Nicki Minaj alisema mara kadhaa kupitia mahojiano na mitandao ya kijamii kwamba alikuwa amechoshwa na maisha ya hadharani na drama za umaarufu.
Alisema anataka furaha halisi nje ya kamera hivyo harusi ya faragha iliwasaidia kuanza maisha mapya bila kelele za mitandao na hiyo indio ilikuwa sababu ya kufunga ndoa ya kimya.