Matembezi hayo yamefanyika ndani ya uwanja wa Metlife, kwa kutambua kuwa mwezi huu wa Oktoba ni mwezi wa kuhamasisha jamii kuhusu ugonjwa huo unaotibika na pia unaweza kuzuilika iwapo mhusika atafanya uchunguzi wa mapema.
Wanaharakati wakiwa kwenye picha ya pamoja baada ya matembezi ya hiari kwa ajili ya kuhamasisha jamii kuhusu saratani ya titi.
Mwezi huu ni heshima kwa mamilioni ya waathiriwa
Shirika la Umoja wa Mataifa la Afya Ulimwenguni, WHO linasema kutambua mwezi Oktoba kama mwezi mahsusi kuhusu saratani ya titi ni hatua ya heshima kwa mamilioni ya maisha yaliyoathiriwa kwa njia moja au nyingine na saratani ya titi, na kuonesha msisitizo wa ahadi ya kimataifa ya kuhakikisha kila mhitaji anapata huduma sahihi na kwa wakati.
Maudhuri ya mwaka huu ni Kila simulizi ni ya kipekee, na kila safari ni muhimu. Na kwa matembezi yaliyofanyika Metlife, kaulimbiu ilikuwa Kupiga Hatua Dhidi ya Saratani ya Titi.
Ukiambiwa una saratani ya titi unakata tamaa, lakini nashukuru Mungu
Lucy Githinji aligundulika kuwa na saratani ya titi mwaka 2022 na amemweleza Assumpta Massoi wa Idhaa hii aliyeshiriki matembezi hayo kuwa, “kusema ukweli unapoenda daktari akueleze kuwa una ugonjwa huo, akili inasimama kabisa, na hujui ufanye nini na uanzie wapi. Unakuwa hufahamu iwapo utapona au la. Ni kweli mwanzoni ilikuwa ni changamoto.”
Mshikamano wa ndugu, jamaa na marafiki pamoja na matibabu vimekuwa ndio ‘muarobaini’ wa changamoto aliyoipata Lucy, kwani kupitia mathalani kikundi cha wanawake wakatoliki, CWA, ambacho yeye pia ni mwanachama, walianzisha matembezi wakati wa mwezi wa Oktoba.
Lucy Githinji, mkazi wa jimbo la New Jersey nchini Marekani katika matembezi ya hiari kwa ajili ya kuhamasisha jamii kuhusu saratani ya titi.
Nashukuru familia,ndugu, jamaa na marafiki
“Matembezi ya mwaka huu ni ya tatu na tunashangilia mwaka wangu wa 3 wa kupona saratani ya titi. Na tunakuja hapa ili kuelimisha watu umuhimu wa kupima matiti, kwani ukienda ukapima mapema na ukakuta una ugonjwa huo, basi utapona,” amesema Lucy.
Ametoa shukrani pia kwa watoa huduma akisema kuwa nao ni mhimili kwa mafanikio yake ya kupona, akisema, “Kwa kweli nawashukuru sana na ninamshukuru Mungu kwani nimebahatika kuwa hapa hadi siku ya leo.”
Akawa na ujumbe kwa familia yake, ndugu, jamaa na marafiki akisema, “asanteni sana.”
Kwa mujibu wa Lucy, mwakani pia watafanya matembezi na kwamba ndani ya kikundi chao kuna mwanakikundi ambaye amebainika kuwa na saratani ya titi, “namwambia asife moyo, atapona kwani mimi ni mfano, na awe na nguvu.”