Rais wa Venezuela Nicolás Maduro ametangaza siku ya Jumatano, Oktoba 29, kwamba jeshi limezuia ndege tatu zinazotumika kwa biashara ya dawa za kulevya katika siku tatu zilizopita.
Imechapishwa:
Dakika 1 Wakati wa kusoma
Matangazo ya kibiashara
Ndege hizi, ambazo amedai zilikuwa zikitoka kaskazini na Karibiani, zilikuwa zimezuiliwa na jeshi la Venezuela mapema siku hiyo. Jeshi la Venezuela pia lilitangaza mapema siku hiyo kwamba liliharibu kambi mbili za kundi la “Tancol” – kifupi kilichoundwa na mamlaka kinachomaanisha “Magaidi wenye silaha wa Colombia” – katika eneo la kusini mwa Amazon nchini Venezuela.
Matangazo haya yanakuja huku Marekani ikituma meli za kivita hadi Karibiani na inafanya mashambulizi ya anga dhidi ya boti za washukiwa wa biashara ya dawa za kulevya. Washington inamtuhumu Nicolas Maduro kwa kuwa sehemu ya kundi la wahalifu, shutuma ambayo rais wa Venezuela anakanusha vikali, akidai kwamba anapambana na biashara ya dawa za kulevya.
Hata hivyo, Marekani ilitangaza mnamo Oktoba 29 kwamba ilifanya shambulio lingine dhidi ya meli iliyoelezewa kuhusishwa na biashara ya dawa za kulevya mashariki mwa Bahari ya Pasifiki, na kuwaua “magaidi wanne wanaojihusisha na biashara ya dawa za kulevya,” Waziri wa Ulinzi wa Marekani Pete Hegseth amethibisha kwenye mtandao wa kijamii wa X, akibainisha, kama baada ya kila moja ya shughuli hizi, kwamba shambulio hilo lilifanywa “katika maji ya kimataifa.”