Katika hotuba ya kulifungua Bunge jipya ya nchi hiyo, Rais Samia amesema hatua hiyo inalenga “kuleta utulivu, haki na maridhiano ya kweli” baada ya machafuko yaliyoibuka kufuatia madai ya ukiukwaji wa haki wakati wa maandamano na hatua za vyombo vya dola.
Rais amesema serikali imeona umuhimu wa kuweka mfumo huru wa kuchunguza matukio yote, kuwasikiliza wadau na kutoa mapendekezo yatakayosaidia taifa kusonga mbele bila migawanyiko.
“Ni muhimu tuwe na tume huru itakayotathmini kilichotokea, itakayowasikiliza wahusika wote na kutupa njia sahihi ya kujenga umoja wa kitaifa,” alisema Rais Samia mbele ya wabunge.
Majukumu ya Tume ya uchunguzi
Wachambuzi nchini humo wamesema majukumu ya Tume hiyo yatajumuisha kuangalia mazingira yaliyosababisha maandamano na vurugu, kukusanya taarifa kutoka kwa vyama vya siasa, asasi za kiraia, viongozi wa dini, na wananchi.
Tume hiyo pia inaweza kuchunguza tuhuma za ukiukwaji wa haki za binadamu zilizotolewa na jumuiya ya kimataifa wakati wa kukabiliana na maandamano.
Vilevile huenda itapendekeza hatua za maridhiano, urejeshaji wa haki, na kuimarisha misingi ya demokrasia na kuandaa mapendekezo ya kisheria na kiutawala ili kuepusha migogoro kama hiyo baadaye.
Haijafahamika iwapo Tume hiyo imekwishaanza kazi wala wajumbe waliotolewa.
Busara kwa Vyombo vya Usalama
Rais Samia pia ametoa wito maalum kwa vyombo vya usalama kuwa na moyo wa huruma kwa vijana waliokamatwa wakati wa maandamano, akisema wengi wao “walijiingiza bila kuelewa madhara ya hatua zao.”
Ameagiza uchunguzi ufanywe kwa kuzingatia tofauti ya waliohusika kwa “makusudi na wale waliokutwa katika mkumbo wa umati.”
Tangazo hilo limepokelewa kama ishara ya serikali kuchukua hatua za kujenga maridhiano ya kitaifa baada ya kipindi kigumu.
Wataalamu wa masuala ya utawala na haki za binadamu wanasema tume hiyo inaweza kuwa hatua muhimu ikiwa itapewa uhuru wa kutosha kufanya kazi kwa uwazi.
Wafuatiliaji katika mitandao ya kijamii wamepongeza hatua hiyo, wakisema ni fursa ya kuunganisha taifa na kurejesha imani ya wananchi katika mifumo ya haki, huku wengine wakisema ni hakua ambayo haitarudisha nyuma kile kichoanzishwa na vijana.