Mwanachama mmoja wa ngazi za juu katika Harakati ya Hizbullah ya Lebanon amesema kuwa harakati hiyo ya muqawama italipiza kisasi cha mashahidi wake na kwamba irada yake kamwe haitadhoofishwa.
Ehab Hamadeh, mjumbe wa mrengo unaounga mkono muqawama ambaye pia ni mbunge katika Bunge la Lebanon, amesisitiza kuwa mashambulizi ya kigaidi ya utawala ghasibu wa Israel dhidi ya vitongoji vya kusini mwa Beirut hatimaye yatakuwa na madhara kwa adui. Amesema muqawama una nguvu na uwezo mkubwa na bila shaka utalipiza kisasi cha mauaji ya mujahidina na raia wake. Hamadeh amesisitiza kwa kusema: “Wengine wanasherehekea uhuru, wakati ardhi ya Lebanon bado inakaliwa kwa mabavu, anga ya nchi inakiukwa na jiografia ya nchi iko mlango wazi mbele ya uchokozi wa maadui.” Hamadeh ametoa wito wa kuwepo umoja wa kitaifa ili kulinda uhai wa Lebanon na kusisitiza kwamba tishio lililopo sio kwa madhara ya madhehebu moja tu, bali kwa mustakabali wa Lebanon nzima na vyama vyake vyote.