Waziri wa Mambo ya Nje wa Venezuela ametumia lugha kali kujibu tuhuma za waziri wa mambo ya nje wa utawala wa kizayuni wa Israel dhidi ya Caracas, kwa kumwita waziri huyo “mhalifu wa kivita” ambaye iwe sasa hivi au baadaye lazima akawajibishwe mbele ya vyombo vya haki na sheria vya kimataifa.
“Jina la Venezuela ni kubwa sana, haliwezi kutamkwa na kinywa chako kichafu”, ndilo jibu ambalo Waziri wa Mambo ya Nje wa Venezuela Yván Gil Pinto amempa waziri wa mambo ya nje wa utawala wa kizayuni Gideon Sa’ar.
Sa’ar, ambaye alikuwa akizungumza mbele ya Baraza la Wawakilishi na Seneti la Paraguay wakati wa ziara yake rasmi ya kwanza nchini Paraguay, alidai kwamba Venezuela “imevuruga uthabiti wa eneo hilo kwa kusababisha mgogoro wa wakimbizi” na pia “ni kiunganishi kati ya Hizbullah ya Lebanon, Hamas na Yemen.”
Katika ujumbe alioweka kwenye mtandao wa Telegram, Gil amejibu tuhuma hizo kwa kumwita waziri huyo mzayuni “mhalifu wa kivita na mhalifu wa mauaji ya kimbari,” na kumwambia: “unachopaswa kufanya si kutaja jina la Venezuela, bali kujiandaa kufikishwa mahakamani kwa jinai zilizofanywa dhidi ya Wapalestina.”
Waziri wa Mambo ya Nje wa Venezuela ameongezea kwa kusema: “jina la Venezuela ni kubwa sana kuweza kutoka kwenye kinywa chako kichafu. Mikono imetapakaa damu za wasio na hatia. Sisi ni taifa linalopambana kwa ajili ya kujitawala na kutetea haki za binadamu na sheria za kimataifa, wakati nyinyi mko kinyume kabisa na hivyo.”
Gil ameendelea kumhutubu waziri wa mambo ya nje wa utawala wa kizayuni kwa kumwambia: “maoni yako wewe hayana umuhimu wowote kwetu sisi, na hotuba zako za kutapatapa hazituathiri chochote. Kitu muhimu pekee ni kwamba iwe ni sasa au baadaye hutakuwa na budi ila kwenda kuwajibika mbele ya vyombo vya haki sheria vya kimataifa.”
Sa’ar, ambaye kwa sasa yuko Paraguay akiwa ameandamana na ujumbe wa wafanyabiashara wa utawala wa kizayuni wa Israel…/