Gazeti la Kiebrania la Haaretz limeikosoa serikali ya utawala wa kizayuni wa Israel na waziri mkuu wake Benjamin Netanyahu, likionya kwamba utawala huo unaelekea kuporomoka kwa ndani huku Netanyahu akifanya juu chini ili kuanzisha vita vipya kwa ajili ya eti kuzuia kile gazeti hilo linachokiita “uangamiaji wa Israel”.
Kwa mujibu wa gazeti hilo, utawala wa kizayuni unaelekea kwa kasi kupanua vita vyake huko Ghaza na Lebanon, huku taasisi za serikali na mfumo wa uendeshaji ukiwa unaporomoka. Hayo, -Haaretz linasema-, yanaleta vurugu za kisiasa na kiusalama ambazo zinamkinga Netanyahu na uwajibikaji.
Gazeti hilo la Kiebrania linaripoti kuwa, utawala ghasibu wa Israel unaonekana kujiandaa kwa vita vikubwa huko Ghaza na Lebanon, katika hatua ya kuzuia kutekelezwa mpango wa vipengele ishirini uliopendekezwa na Donald Trump.
Katika siku za hivi karibuni, jeshi la utawala wa kizayuni wa Israel limeshadidisha mashambulizi yake huko Ghaza na kuwaua shahidi Wapalestina kadhaa, sambamba na kushambulia maeneo kadhaa ya ardhi ya Lebanon. Haaretz linavielezea vitendo hivyo kama “jaribio la kimahesabu” la kupima mipaka ya makubaliano ya sasa na uwezo wa wapatanishi wa kimataifa kuhimili hatua za Israel za kushadidisha mashambulio.
Gazeti hilo la Kiebrania limetoa indhari ya utawala wa kizayuni kuporomoka kwa ndani katika hali ambayo, gazeti jengine la Kiebrania la Yedioth Ahronoth liliripoti hivi karibuni indhari nyingine iliyotolewa na wataalamu wa Israel kwamba, jamii ya kizayuni inakabiliwa na janga kubwa la afya ya akili ambalo wamelielezea kuwa ni “tsunami ya afya ya akili” iliyowaathiri raia wapatao milioni mbili.
Wataalamu wa afya wameeleza kwamba, kufuatia matukio ya Oktoba 7, 2023 kumekuwepo na ongezeko kubwa la watu wanaoomba ushauri na usaidizi wa kisaikolojia, sambamba na kuongezeka kiwango cha uraibu na kudhoofika mafungamano ya kijamii.
Muungano wa mashirika manane ya Israel yanayohusika na afya ya akili umetoa tahadhari kubwa kwa serikali ya utawala wa kizayuni juu ya kile ulichokieleza kuwa ni hali ya maafa ambayo haijawahi kushuhudiwa ya mripuko wa ugonjwa wa akili wa kiwewe kilichoenea katika jamii, hali mbaya ya watu kupoteza imani sambamba na kuwepo uhaba mkubwa mno wa vituo vya utoaji huduma za tiba ya matatizo hayo…/