Katibu wa Baraza Kuu la Usalama wa Kitaifa la Iran (SNSC) Ali Larijani ameishukuru Pakistan kwa kuiunga mkono Tehran wakati wa “vita visivyo vya haki” vya mwezi Juni 2025 vilivyoanzishwa na utawala wa Kizayuni na Marekani dhidi ya Jamhuri ya Kiislamu.
Dk Larijani ametoa shukran hizo kupitia mtandao wa kijamii wa X na kuongeza kuwa, Jamhuri ya Kiislamu inaishukuru Pakistan kwa kusimama katika msingi wake wa uwajibikaji na kuiunga mkono Iran wakati wa vita vya kulazimishwa na ameuita msimamo huo kuwa ni kielelezo cha fikra thabiti na za kimfumo za wananchi wa Pakistan na viongozi wao.
Larijani ambaye yuko ziarani nchini Pakistan amesema pia kwamba ameelekea nchini humo kuwasilisha salamu za Kiongozi wa Mapinduzi ya Kiislamu Ayatullah Sayyid Ali Khamenei kwa wananchi wa Pakistan.
Kabla ya kutuma ujumbe huo wa mtandao wa kijamii wa X, Larijani alikuwa ameshazungumza kwa nyakati tofauti na Waziri Mkuu wa Pakistan Shehbaz Sharif, Rais Asif Ali Zardari na Spika wa Bunge la Taifa la Pakistan, Sardar Ayaz Sadiq.
Kwa mujibu wa taarifa ya serikali ya Pakistan, Larijani na Shehbaz Sharif wametilia mkazo kuimarishwa uhusiano wa kihistoria na wa kidugu kati ya Iran na Pakistan na kuhimiza kuweko ushirikiano wa kina katika nyanja nyingi. Waziri Mkuu wa Pakistan, Shehbaz Sharif amesifu misimamo ya kikanda ya Iran inayoheshimu kikamilifu sheria za kimataifa na za ujirani mwema na amewasilisha shukran zake kwa Tehran kutokana na mshikamano wake na Pakistan.
Pande mbili zimekubaliana kwamba ujumbe utakaoongozwa na Waziri wa Mambo ya Nje wa Pakistan, Mohammad Ishaq Dar utafanya ziara karibuni hivi nchini Iran ili kuzidi kustawisha ushirikiano, hasa katika masuala ya kilimo na mawasiliano.