Katibu Mkuu wa Umoja wa Mataifa António Guterres ametoa onyo kali katika hotuba yake kwa Mkutano wa Saba wa Pamoja wa Umoja wa Afrika na Umoja wa Ulaya unaofanyika mjini Luanda Angola akisema, dunia inapitia mabadiliko ya kasi na ya kina, yanayochochewa na janga la tabianchi, kuongezeka kwa ukosefu wa usawa na misisimko ya nguvu za kimataifa.
Guterres ameyatolea mwito mabara mawili ya Afrika na Ulaya wa kuwa sehemu ya enzi mpya ya ulimwengu wa kimataifa, unaojengwa juu ya ushirikiano badala ya mgawanyiko.
Katika hotuba yake hiyo, Katibu Mkuu wa UN ametaja maendeleo endelevu kuwa kipaumbele cha kwanza kwa dunia, akikosoa vikali mfumo wa sasa wa fedha duniani ambao ameuita “usio sawa na usio na ufanisi, na ambao tayari unapendelea mataifa tajiri“.
Amewataka viongozi wa mataifa, hasa ya Ulaya kuunga mkono mageuzi makubwa, ikiwemo kukomesha “mzunguko wa madeni unaobana koo nchi masikini, kuongezwa mara tatu kwa uwezo wa kukopesha wa benki za maendeleo za kimataifa, na kuongeza ushiriki wa nchi zinazoendelea hasa zile za Afrika katika taasisi za kifedha za dunia.”
Guterres amewakumbusha viongozi washiriki wa mkutano huo kwamba, kwa pamoja, Umoja wa Afrika na Umoja wa Ulaya zinawakilisha asilimia 40 ya nchi wanachama wa Umoja wa Mataifa, na hivyo zina uzito wa kisiasa unaoweza kusukuma mbele sheria za kimataifa, kufanikisha makubaliano na kuunda utawala wa dunia.
Katika sehemu nyingine ya hotuba yake, Katibu Mkuu wa UN ametoa wito wa umoja katika kipindi ambacho amekitaja kuwa chenye misukosuko lakini pia chenye fursa.
“Kutoka kwenye misukosuko ya leo, mnaweza kuunda enzi mpya ya matumaini,” amesema, huku akizihimiza AU na EU kujenga dunia ambayo “udhalimu na ukosefu wa usawa vinatokomezwa hatua kwa hatua.”
Ujumbe wa mwisho aliotoa Guterres kwa washiriki wa mkutano wa Angola ni wa kuwepo ushirikiano wa kina kati ya mabara mawili ya Afrika na Ulaya “Kwa ajili ya umoja. Kwa ajili ya usawa. Na kwa ajili ya amani”…/