Dar es Salam. Mfungwa anayetumikia kifungo cha miaka 20 gerezani kwa kukutwa na meno ya tembo, Song Lee, ameieleza Mahakama ya Hakimu Mkazi Kisutu jinsi aliyekuwa Mkuu wa Gereza la Ukonga, Josephat Mkama alivyopokea Sh45 milioni ili amtoe gerezani na kumwachia huru.
Raia wa China Song ni mfungwa namba 585/2019 katika Gereza la Segerea. Mahakama ya Wilaya ya Mbeya ilimuhukumu kutumikia kifungo cha miaka 20 jela kwa kosa la kukutwa na nyara za Serikali.
Song aliyehukumiwa adhabu hiyo mwaka 2016 na mwaka 2019 alihamishiwa Gereza la Ukonga, Dar es Salaam kuendelea kutumikia kifungo,
alitoa ushahidi jana Ijumaa Novemba 28, 2025 kwa lugha ya Kiingereza.
Mkama na wenzake, Sibuti Nyabuya, aliyekuwa ofisa Tehama wa Gereza la Ukonga na mfanyabiashara, Joseph Mpangala, wanakabiliwa na kesi ya uhujumu uchumi namba 25517/2024 wakishtakiwa kwa makosa manne ya kuongoza genge la uhalifu, kughushi barua ya msamaha wa Rais kwa wafungwa, kuwasilisha nyaraka ya kughushi na kujipatia Sh45 milioni kwa njia ya udanganyifu.
Wanadaiwa kughushi barua ya msamaha wa Rais kwa ajili ya wafungwa watatu raia wa China, ambao ni namba 585/2019 Song Lee, namba 205/2019 Xiu Fu Jie na namba 206/2016 Haung Quin. Wote wanatumikia kifungo kwa makosa ya kukutwa na nyara za Serikali, ambazo ni meno ya tembo katika kesi tofauti wakiwa hawajuani.
Ushahidi wa Song
Akiongozwa kutoa ushahidi na Wakili wa Serikali Mwandamizi, Daisy Makakala, mbele ya Hakimu Mkazi Mwandamizi, Geofrey Mhini, alidai Desemba 2022 akiwa Gereza la Ukonga, Mkama aliwaita yeye na wafungwa wenzake wawili waende ofisi kwake.
“Tulipofika ofisi kwa Mkama, mimi na wenzangu wawili ambao ni raia wa China, bwana jela (Mkama) alituonyesha barua ya msamaha wa wafungwa iliyotolewa na Rais. Barua ile ilikuwa imeandikwa kwa lugha ya Kiswahili na ilikuwa na majina yetu watatu,” amedai.
Amedai walielekezwa waende ofisi ya utawala ya gereza hilo kwa kuwa wanatakiwa kupewa msamaha wa Rais ili watoke gerezani.
Alipohojiwa na wakili alijuaje kama barua hiyo ya msamaha imeandikwa kwa lugha ya Kiswahili? Alijibu lugha na maandishi yake anaijua kidogo.
Amedia walipomwendea ofisa utawala aliwataka wasubiri.
“Ofisa utawala alituambia mlitakiwa kupelekwa ofisi ya Uhamiaji lakini wamefunga ofisi, hivyo mtapelekwa kesho,” amedai.
Shahidi amedai kesho yake hawakuachiwa, hivyo wakaenda kwa Mkuu wa Gereza la Ukonga wakamweleza hawajaachiwa, naye akawaambia kama wanataka kutoka wanatakiwa kulipa fedha.
Mshtakiwa amedai bwana jela alimpa simu akawasiliana na rafiki yake kuhusu fedha zinazotakiwa ili watoke gerezani.
“Nilimpigia rafiki yangu Zheng. Wakati tunaendelea kuongea, Mkama alimpigia simu mtu mwingine aitwaye Joseph Mpangala (mshtakiwa wa tatu) ili aje eneo hilo,” amedai.
Ameeleza Zheng alikwenda gerezani akamweleza kinachohitajika na akakubali kutoa fedha.
Amedai Mkama alimwelekeza Joseph Mpangala aende ofisini kwa Zheng ambako atapewa Sh30 milioni. Amedai bwana jela aliwaeleza amepokea kiasi hicho akaahidi siku inayofuata watatoka gerezani na kuwa huru.
”Siku iliyofuata tulisubirii lakini hakuna kilichofanyika, tukarudi tena kwa bwana jela, akatuambia anaomba tumpe Sh15 milioni na hiyo itakuwa ni ya mwisho,” amedai huku akichanganya lugha ya Kiingereza na Kiswahili.
Amedai alimpigia simu tena rafiki yake kuhusu kiasi hicho cha fedha kinachohitajika.
“Rafiki yangu alihoji, juzi niliwapa Sh30 milioni na leo tena mnataka Sh15 milioni? Hata hivyo, alikubali kutoa fedha akampa Mpangala ili azipeleke kwa Mkama,” amedai na kuongeza kuwa bwana jela aliwaambia ameshapokea Sh15 milioni.
“Bwana jela baada ya kupokea Sh 15 milioni, alituambia kwa asilimia 100 kesho tutaondoka gerezani kwenda nyumbani na sisi tulifurahi,” amedai.
Hata hivyo, hawakutoka wakaenda kulalamika kwa bwana jela aliyewaeleza muda si mrefu watatoka.
“Baada ya kuona hatutoki gerezani, niliandika barua ya ya malalamiko kuonana na RPO (Mkuu wa Magereza wa Mkoa) lakini barua hiyo ilikataliwa kupelekwa,” amedai.
Amedai maofisa kutoka Takukuru, Ofisi ya Taifa ya Mashtaka (NPS), Jeshi la Polisi, Mahakama na taasisi nyingine walitembele Gereza la Ukonga, ndipo alipotoa malalamiko yake kwa viongozi hao.
“Baada ya miezi sita kupita, tulihamishwa gereza kupisha uchunguzi, mimi nilipelekwa Segerea, wenzangu walipelekwa Gereza la Maweni, Tanga na Isanga, Dodoma,” amedai.
Alipoonyeshwa na wakili barua ya msamaha wa Rais inayodaiwa ni ya kughushi, shahidi aliitambua kutokana na jina lake, namba yake ya mfungwa na saini ya Mkuu wa Gereza la Ukonga kwa wakati huo.
Vilevile, aliwatambua washtakiwa kwa kuwagusa mkono na kuwataja kwa majina.
Kesi hiyo imeahirishwa hadi Desemba 11, 2025 siku ambayo wafungwa wawili waliosalia watatoa ushahidi.