Jeshi la Israel limejigamba kuwa halina mpango kabisa wa kuondoka kwenye ardhi ulizozivamia na kuzikalia kwa mabavu huko Syria licha ya wanajeshi wake sita kujeruhiwa wakati wananchi wa Syria walipoamua kupambana na Wazayuni hao maghasibu.
Kwa mujibu wa gazeti la Kizayuni la Yedioth Aharonot, baada ya wanajeshi sita wa Israel kujeruhiwa katika operesheni za kukabiliana na wananchi wenye hasira wa Syria na baada ya Wazayuni kufanya mashambulizi ya ardhini na angani dhidi ya wananchi hao katika kijiji cha Beit Jen cha kusini-magharibi mwa Syria, viongozi wa Israel wametamba kuwa hawataondoka kwenye ardhi ya Syria na wametuma onyo kali kwa serikali ya Damascus kuiambia kuwa hakuna nguvu zitakazowazuia kubakia katika maeneo waliyoyateka ya Syria.
Wachambuzi wa kijeshi wa Israel wamedai kuwa, kuondoka katika maeneo ya Syria yanayokaliwa kwa mabavu na Wazayuni hao kutasababisha ombwe la usalama na kupata nguvu makundi yanayoupinga utawala wa Kizayuni. Wanadai kuwa Israel imezivamia na kuzikalia kwa mabavu ardhi za Syria ili kuzuia kile walichodai ni “tishio kubwa la kimkakati” kwa usalama wa utawala wa Kizayuni.
Mmoja wa maafisa usalama wa utawala wa Kizayuni amesema kuhusu Muqawama wa wananchi wa Syria katika kijiji cha Beit Jann na mapambano yao dhidi ya wanajeshi vamizi wa Israel kwamba: “Mapambano hayo yanazidi kuonesha kuwa jeshi la Israel halipaswi kuondoka kwenye maeneo unayoyakalia kwa mabavu nchini Syria hasa mlima wa kimkakati wa Jabal al-Sheikh.
Maafisa wa Israel sasa wana kiwewe kwamba Muqawama wa wanchi wa Syria dhidi ya jeshi la Israel utaenea pia kwenye vijiji vingine, suala ambalo litavuruga njama zao za kuugeuza uvamizi wa kijeshi kuwa kuyakalia kwa mabavu milele maeneo hayo ya Syria.