Marais Felix Tshisekedi wa Jamuhuri ya Kidemokrasia ya Congo na mwenzake wa Rwanda Paul Kagame wiki ijayo wanatarajiwa kutia kusaini makubaliano ya mwisho yanayolenga kufikia amani ya kudumu mashariki mwa Congo.
Felix Tshisekedi na Paul Kagame wiki ijayo wanatarajiwa kuelekea Marekani kusaini makubaliano hayo ya amani baada ya mzozo wa miaka kadhaa.
Rais wa Kongo Felix Tshisekedi amethibithisha kwamba utiaji saini utafanyika Desemba 4, siku moja baada ya Rais wa Rwanda Paul Kagame kuonyesha matumaini kuhusu makubaliano hayo. Tshisekedi amese amani ya kudumu katika eneo la mashariki mwa Kongo itaweza tu kupatikana ikiwa watu wanaohusika moja kwa moja watajitolea kufikia matokeo mazuri.
Msemaji wa Rais Tshisekedi, Tina Salama, ameliambia shirika la habari la Associated Press kwamba utiaji saini wowote wa Kongo utategemea hatua ya Rwanda ya kusitisha kuwasaidia waasi wa M23.
Msemaji wa Rais Tshisekedi, ameongeza kusema kwamba makubaliano ya amani lazima yafikiwe na pasipo na mchanganyiko wa aina yoyote na bila kuwajumuisha wapiganaji wa M23. Amesisitiza juu ya hatua ya kuondolewa kwa wanajeshi wa Rwanda jambo ambalo tayari lilikubaliwa katika makubaliano ya awali yaliyosainiwa mwezi Juni na mawaziri wa mambo ya nje wa Kongo na Rwanda.
Eneo la Mashariki mwa Kongo linakabiliwa na mapigano kati ya vikosi vya serikali na zaidi ya makundi 100 yanayomiliki silaha, na yenye nguvu kama lile la waasi wa M23 wanaodaiwa kuungwa mkono na Rwanda.
Wataalamu wa Umoja wa Mataifa wamesema serikali ya Rwanda imepeleka kati ya vikosi 3,000 na 4,000 huko mashariki mwa Kongo, vinavyoendesha shughuli pamoja na waasi wa M23. Rwanda imekanusha kuwa inawasaidia waasi hao lakini imesema hatua yoyote inayochukua katika mzozo huo ni kwa ajili ya kulinda eneo lake.