NAIBU Waziri wa Utamaduni, Sanaa na Michezo, Hamis Mwinjuma (Mwana FA), amesema licha ya maneno mengi kuhususiana na mabadiliko ya Katiba ya Klabu ya Simba, ila serikali haitoingilia uamuzi wa wanachama.
Mwana FA, amezungumza hayo leo katika Ukumbi wa Diamond Jubilee jijini Dar es Salaam, wakati akitoa hotuba yake kwa niaba ya serikali ya Jamhuri ya Muungano wa Tanzania.
“Naomba nisisitize jambo, serikali hailazimishi klabu yoyote nchini kufanya kile inachohitaji, isipokuwa kwa uamuzi wa wanachama pekee.”
Mwana FA, amesema lengo kuu la serikali ni kusimamia kanuni na sheria za nchi zinazohitajika na wala sio kwa kusudio lingine kama inavyoelezwa.
“Kikubwa ni kuzingatia na kuheshimu maslahi ya wanachama, Wadhamini na kukidhi matakwa ya kisheria ambayo yanaendana na kihitajika kwa mujibu maelekezo ya serikali yetu.”
Aidha, Mwana FA, amesema Serikali haiwezi kutoa maelekezo yoyote ya kushnikiza jambo lolote, isipokuwa kwa uamuzi wa wanachama ambao ndio utakaoleta na kuzalisha matokeo chanya.
“Simba ni taasisi kubwa, hivyo ndugu zangu niwaombe marekebisho ya Katiba yafanyike kwa utulivu na kwa maslahi mapana ya Wanachama.”
Kauli ya Mwana FA, inatokana na agizo serikali kupitia Baraza la Michezo la Taifa (BMT), kutoa maelekezo ya Katiba mpya ya Simba inapaswa kumtambua Mwenyekiti wa Klabu kuwa ndiye Mwenyekiti wa Bodi ya Wakurugenzi maana klabu ina umiliki mkubwa (51%) na wawekezaji (49%).
Pia, serikali imetaka Katiba ifanyiwe maboresho ya kutamka bayana kuwa Mwenyekiti wa Simba SC ndiye Kiongozi Mkuu wa chombo cha Utawala ndani ya klabu na hivyo awe na mamlaka ya kuitisha mkutano mkuu wa wanachama kwa kuwa masuala yanayojadiliwa juu ya uanachama na maendeleo ya klabu yanaathiri moja kwa moja maslahi ya wanachama.
Aidha, Mwenyekiti wa klabu hiyo ndiye awe Mwenyekiti wa Bodi ya Wakurugenzi ya Simba Sports Club Company Limited kwa kuzingatia kuwa wanachama kupitia klabu ndio wenye umiliki wa hisa nyingi (51%), hivyo viongozi wote walio chini ya Katiba ya Klabu watawajibika kwake katika kutekeleza majukumu yao kwa mujibu wa sheria, Katiba na kanuni zinazoongoza Klabu.
Mbali na hilo, Serikali pia imetaka kurekebishwa kwa matumizi ya neno ‘Mwekezaji’ ndani ya rasimu ya Katiba na badala yake itumike dhana pana ya ‘Wawekezaji’ na iweke bayana kuwa Baraza la Wadhamini kwa niaba ya wanachama, ndilo litakaloingia mikataba na makubaliano yoyote na wawekezaji.
Marekebisho haya yanakusudia kupanua wigo wa uwekezaji wa kibiashara ndani ya klabu kwa maendeleo na ulinzi wa maslahi ya wanachama kama wamiliki halali wa Simba Sports Club.