Khatibu wa Sala ya Ijumaa mjini Tehran amesema maadui wa Iran wanajaribu kutumia matatizo ya kiuchumi ili kuibua mzozo wa kiusalama.
Hujjatul-Islam Ali Akbari amegusia matukio na matukio ya hivi karibuni katika uchumi wa Iran na kusema: “Katika siku zilizopita tumeshuhudia wasiwasi wa wafanyabiashara, wauzaji sokoni na tabaka la watu wema kuhusu kutokuwa na uthabiti wa kiuchumi na kupanda kwa thamani ya fedha za kigeni.” Amesema wasiwasi huu ni wa kweli na wa haki kwani mfumuko wa bei na misukosuko ya soko imeleta shinikizo dhahiri katika maisha ya wananchi, hususan tabaka la wafanyakazi kazi , wazalishaji na wafanyabiashara.
Akiendelea na hotuba yake, amesema kuwa serikali na mfumo wa utawala wanatambua changamoto hizi za maisha. Ameongeza: kutatua matatizo haya kumewekwa katika ajenda ya dharura na kipaumbele cha juu kabisa.
Hujjatul-Islam wal-Muslimin Haj Ali Akbari, amesisitiza juu ya kutofautisha kati ya maandamano halali na vurugu, na kuongeza kuwa: “maandamano ni haki ya kiasili ya wananchi na wafanyabiashara, na hakuna shaka katika hilo. Lakini maandamano halali yanategemea busara na kuzingatia mipaka ya kisheria.”
Khatibu wa Ijumaa mjini Tehran amesema: “Ramani ya wazi ya adui ni kuyageuza matatizo ya kiuchumi kuwa mgogoro wa kiusalama.” Akiashiria kushindwa Marekani na utawala wa Kizayuni wa Israel katika vita vyao vya siku 12 dhidi ya Iran mwezi Juni mwaka jana, Hujjatul-Islam wal-Muslimin Haj Ali Akbari amesema: ” Wale ambao hawakufanikisha malengo yao katika vita vya siku kumi na mbili, leo wamesema wazi kuwa wameweka matumaini yao katika kuchochea machafuko ya ndani.”