Hali bado ni tete katika maeneo kadhaa yaliyoko kilomita zaidi ya ishirini kusini mwa jiji la Uvira katika mkoa w Kivu Kusini, mashariki mwa Jamhuri ya Kidemokrasia ya Kongo (DRC).
Imechapishwa:
Dakika 1 Wakati wa kusoma
Matangazo ya kibiashara
Mapigano mapya yamezuka Jumamosi, Januari 3, kati ya jeshi la Kongo, likisaidiwa na wanamgambo wa Wazalendo, na AFC/M23, wakishirikiana na kundi la Twirwaneho na kuungwa mkono na Rwanda, kulingana na ripoti mbalimbali za Umoja wa Mataifa. Mapigano haya yalitokea Kigongo na maeneo mengine ya jirani; milipuko ilisikika hadi Uvira.
Mashahidi wanaripoti kusikia milio ya risasi na milipuko mikubwa katika nyanda za juu zinazozunguka Uvira. Lydia, mkazi wa Uvira, ameelezea wasiwasi wake: “Wakati mwingine tunasikia milio ya risasi na milipuko milimani, wakati mwingine kuna ufyatuaji risasi katika vitongoji. Hakuna mahali pa kukimbilia.” Kila mtu analia, kila mtu anakaa ndani. Na bado, watu wanaendelea kutembea licha ya milio ya risasi.
“Tunalala kanisani”
Licha ya hofu hizi, shughuli zinaendelea kama kawaida katikati ya mji wa Uvira. Mapigano haya yamewalazimisha wakazi wa vijiji kadhaa kukimbia maeneo ya jirani. Raphaël, baba wa watoto sita, aliondoka Kigongo kwenda Uvira, lakini hali ni ngumu: “Tunalala kanisani. Hakuna maji; wengine wanachota maji kutoka Ziwa Tanganyika, wengine wanatumia maji ya mvua. Ni tatizo kubwa. Lazima tufanye kila tuwezalo kukomesha mgogoro huu.” “Tunawataka waheshimu kile walichosaini.”
Mick Mutiki, kiongozi wa mfumo wa uratibu wa mashirika ya kiraia katika mkoa wa Kivu Kusini, anatoa wito kwa pande zinazopigana kuheshimu usitishaji mapigano: “Tunaamini kuna mchakato unaoendelea kati ya Rwanda, Marekani, na DRC. Mikataba tayari imesainiwa. Tunachoomba ni kwamba waheshimu kile walichosaini. Lazima kuwe na usitishaji mapigano, mateso lazima yaishe, na raia lazima wapate amani.”
Mashirika ya kiraia pia yanalaani uharibifu wa vituo vingi vya afya na elimu kufuatia mapigano ya hivi karibuni.