Ofisi ya Umoja wa Mataifa ya Kupambana na Dawa za Kulevya na Uhalifu UNODC imeonya kuwa kuongezeka kwa muunganisho wa kidijitali kunakwenda sambamba na ongezeko kubwa la uhalifu wa mtandaoni.
Katika taarifa ambayo imetolewa katika Siku ya Kimataifa Dhidi ya Uhalifu wa Mtandaoni ambayo imeadhimishwa tarehe 24 Desemba, UNODC imesema zaidi ya theluthi mbili ya watu duniani wameweza kufikia mtandao mwaka 2023, na dunia ya kidijitali imeleta mabadiliko makubwa na manufaa mengi, lakini pia imefungua mlango wa hatari kubwa.
UNODC imesema: “Muunganisho wa mtandao umebadilisha maisha na kuleta manufaa mengi, lakini ulimwengu wa kidijitali pia una hatari kubwa.” Taasisi hiyo ya Umoja wa Mataifa imeonya kuwa wahalifu wa mtandaoni wanatumia mifumo ya kidijitali kuiba fedha, data na taarifa nyeti.
UNODC imesema tishio la uhalifu mtandaoni linaendelea kuongezeka, ambapo makundi ya uhalifu yameanzisha kile kinachojulikana kama “makampuni ya utapeli,” yakisimamia kwa ustadi mitandao ya utapeli inayolenga waathiriwa kote duniani.
“Tishio hili linaendelea kuongezeka,” UNODC imesema, ikibainisha kuwa mitandao ya kihalifu inatumia mahusiano ya kimapenzi mtandaoni, ulaghai wa uwekezaji na mbinu nyingine za utapeli kuwalaghai waathiriwa mabilioni ya dola.
Wakati huo huo, ofisi hiyo imeeleza wasiwasi mkubwa kuhusu gharama ya kibinadamu ya uhalifu huo, ikisema kuwa makundi hayo yanawavuta watu kupitia majukwaa ya mtandaoni na kuwasafirisha kwa nguvu ili kufanya kazi katika vituo vya utapeli. UNODC imesema: “Uhalifu huu unawaathiri waathiriwa katika nchi zilizoendelea zaidi huku ukiwasafirisha na kuwanyonya waathiriwa kutoka nchi maskini zaidi.”
UNODC imesisitiza kuwa kinga ndiyo ngao bora dhidi ya uhalifu wa mtandaoni na unyonyaji wa kidijitali, ikitoa wito wa kuchukuliwa kwa hatua za haraka kuongeza uelewa wa hatari hizo duniani kote.