Mashariki mwa DRC, hali ya kibinadamu inaendelea kuzorota katika mkoa Kivu Kusini. Wiki mbili baada ya kuanguka kwa mji wa Uvira mikononi mwa waasi wa AFC/M23, mapigano yanaendelea katika maeneo kadhaa katika eneo la Fizi, ambapo vikosi vya Kongo na Burundi vililazimika kuondoka.
Imechapishwa:
Dakika 1 Wakati wa kusoma
Matangazo ya kibiashara
Muktadha huu usio thabiti wa usalama unapunguza ufikiaji na kuwahudumia watu waliokimbia makazi yao, wanaokadiriwa kuwa 265,000 kulingana na mashirika ya kiraia. Mashirika haya yanaonya kuhusu hali “mbaya”, inayochochewa haswa na kuibuka kwa milipuko ya kipindupindu.
Mashariki mwa DRC, na haswa katika eneo la Fizi, hali ni “tete na mbaya zaidi,” vyanzo vya usalama vinaripoti. Mapigano huripotiwa mara kwa mara kwenye barabara ya Baraka-Makobola na kusini zaidi, katika nyanda za juu zinazozunguka Rugezi. Idadi ya wakazi wanaolazimika kukimbia inaendelea kuongezeka kila kukicha. Wengi hupewa hifadhi na familia zinazoishi katika eneo hilo au hukusanyika katika makazi yasiyo rasmi, “katika hali isiyo ya kibinadamu,” yanaonya mashirika ya kiraia.
Kukimbia wakati mwingine kunahatarisha maisha kutokana na ukosefu wa usalama. Hili linathibitishwa, haswa, na gharama kubwa ya usafiri. Kwa mfano, safari ya pikipiki kati ya Baraka na Misisi imeongezeka mara nne kutoka faranga 50,000 hadi 200,000 za Kongo (kutoka euro 18 hadi euro 74) kutokana na hatari hizo.
Baadhi hawana chaguo ila kuchukua njia hatari sana za ziwa Tanganyika kujaribu kufika Burundi. Yote haya pia yanazuia harakati za wafanyakazi wa kibinadamu, ambao tayari ni wachache katika eneo hilo. Vyanzo vingi vinaripoti kuibuka kwa milipuko kadhaa ya kipindupindu, haswa huko Sebele na kwenye rasi ya Ubwari, mkabala na Baraka. Inatisha, chanzo cha usalama kimesema, haswa kwa kuwa “hakuna mwitikio wa kiafya” ambao umetekelezwa hadi sasa.
“Bila upatikanaji wa maji ya kunywa, watu wanapata maji kutoka mito na ziwa Tanganyika pekee, ambapo pia hujisaidia,” chanzo hiki kimeeleza. MSF haijaanza tena shughuli zake katika eneo hilo, ambazo zilisitishwa siku kumi zilizopita kutokana na mapigano. Shirika hilo lilikuwa likifanya kampeni ya kudhibiti Malaria katika eneo hilo, kwani Malaria pia imeenea katika eneo hilo.