Baada ya mazungumzo mengi na shinikizo kubwa kutoka kwa mamlaka ya Uingereza, London na Kinshasa hatimaye zimefikia makubaliano ambapo DRC imejitolea kuwarejesha nyumbani raia wake wasio na vibali waliofukuzwa nchini Uingereza.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Kinshasa, Pascal Mulegwa
Tangazo hilo lilitolewa baada ya mkutano kati ya balozi wa Uingereza nchini DRC na Crispin Mbadu, Waziri Mjumbe mwenye dhamana ya diaspora ya Kongo na Francophonie, baada ya wiki kadhaa za mvutano wa kidiplomasia kati ya London na Kinshasa. Kulingana na upande wa Uingereza, DRC hatimaye imekubali kuwarejesha raia wake wasio na vibali waliofukuzwa nchini Uingereza—pamoja na wale waliohukumiwa nchini humo.
Ingawa upande wa Kongo haujatoa taarifa yoyote au maoni yoyote kuhusu habari hiyo, London inaonyesha makubaliano hayo kama hatua kubwa. Baada ya kukaribisha makubaliano hayo kwenye mtandao wa kijami wa X, Waziri wa Mambo ya Ndani wa Uingereza Shabana Mahmood pia alionya serikali zote za kigeni zinazokataa kukubali kurejea kwa raia wao kwamba “zitakabiliwa na athari kubwa.”
Shinikizo
Ingawa London hapo awali iliikosoa DRC kwa ukosefu wa ushirikiano katika kuwarejesha raia wake wasio na vibali, shinikizo dhidi ya Kinshasa limeongezeka kwa kasi tangu mwisho wa mwezi Desemba, wakati mamlaka ya Uingereza ilipoamua kuweka vikwazo vya visa kwa DRC ili kuilazimisha kujadiliana. Kufuatia hili, Uingereza ilitishia kwenda mbali zaidi na kusimamisha tu utoaji wa visa kwa raia wa Kongo.
Kabla ya makubaliano kufikiwa, mikutano mingi ilifanyika kati ya pande hizo mbili. Kulingana na chanzo kilicho karibu na jambo hilo, majadiliano lazima sasa yaendelee ili kufafanua mipango ya vitendo ya marejesho hayo, ambayo DRC ina sharti moja: kwamba yafanyike chini ya masharti yaliyo wasi, ikiwa ni pamoja na utambuzi wa awali wa watu husika na heshima ya haki za binadamu. Kinshasa inarudia kwamba hakuna suala la mtu kufukuzwa linaweza kutokea ikiwa kuna shaka yoyote kuhusu uraia wa mtu husika.